Питрәч җирендә булачак уңышны ничек чәчәләр

Фото: © Валерий Мирошников / «Питрәч-информ»

Керәшен Сәрдәсе, Екатериновка, Нептун авыллары янындагы иксез-чиксез кырларда эш кайный – “Август-Теләче” авыл хуҗалыгы предприятиесе районда беренче чәчү кампаниясен башлады. Заманча технологияләр язгы чәчүгә дә үзгәрешләр кертә.

Элек язгы басуларда җир сукалаучы тракторлар гөрелтесе ишетелеп тора иде һәм ул узып киткәннән соң кап-кара туфрак кала иде. Хәзер картина башкача — “Август” техникасы чәчүне туфракның бөтенлеген бозмыйча үткәрә. — Без “ноу-тилл” системасы буенча эшлибез, — дип аңлатты предприятиенең баш агрономы Фаяз Гыймаев.

— Без сукаламыйбыз, дисклау үткәрәбез – туфракны өстән эшкәртәбез. Мүлчәне – узган елгы үсемлекләрнең вакланган калдыкларын җир өстендә калдырабыз, алар табигый ашламага һәм дымны саклый торган саклагыч катламга әверелә.

Чыннан да, аяк астында ялангач җир түгел, ә камыл һәм үсемлек калдыкларыннан ясалган тыгыз катлам. Агроном сүзләренә караганда, мондый алым уңдырышлы катламны эрозиядән саклап кына калмый, ягулыкны да шактый экономияли — чөнки техника операцияләрне азрак башкара. Шулай ук уңдырышлылык арта.

Фото: © Валерий Мирошников / «Питрәч-информ»

Механизатор Нияз Тимербаев чәчү агрегатының ничек эшләвен күрсәтте. Куәтле “Клаас” тракторы чәчү комплексын һәм ашламалар салынган цистернаны тартып бара. Автопилот траекториянең төгәллеген тәэмин итә, аннары эшкәрткәндә трактор нәкъ үз эзе буенча бара. Комплекс эшен күзәтү өчен кабинада 4 дисплей һәм кондиционер бар.

— Иртәнге алтыда башлыйбыз, кичке алтыга тәмамлыйбыз, – дип сөйли Нияз, эшеннән тукталмыйча гына. – Аннары смена алышына, һәм чәчү фаралар яктысында дәвам итә. Яңгырлар безне бераз тоткарлады, хәзер һава торышы әйбәт тора, эшне тизрәк тотарга кирәк.

Ритм чыннан да киеренке: чәчү агрегатлары көнбагыш чәчкәндә, сиптергечләр беренче чәчүлекләрне гербицидлар белән эшкәртәләр.

— Сиптергеч бер сменада 600 гектарга кадәр эшкәртә, – ди участок башлыгы Марсель Сөнгатуллин. – Колачлау киңлеге – 36 метр, шуңа күрә вакытында өлгерәбез.

Быел “Август-Теләче” җиде мең гектар чәчә. Төп культуралар – сабан бодае, көнбагыш һәм майлы җитен.

– Көзен биш мең гектар җир әзерләдек, өстән эшкәрттек, – дип аңлатты Фаяз Гыймаев. – Хәзер иң мөһиме – оптималь срокларга сыешу. Бодай чәчтек инде, хәзер көнбагышны бетерәбез, аның артыннан җитен китәчәк.

Фото: © Валерий Мирошников / «Питрәч-информ»

Предприятие орлыклар, ашламалар һәм ягулык-майлау материаллары белән тулысынча тәэмин ителгән – бензин ташу машинасы көнгә ике тапкыр техникага ягулык салу өчен басуга килә. Әлегә “Август-Теләче” Питрәч җирләрен үзләштерә генә, әмма хуҗалыкның планнары җитди. Якын арада Чыты авылында предприятиенең үз базасы барлыкка киләчәк, бу күбрәк җирле механизаторларны җәлеп итәргә мөмкинлек бирәчәк.

– Әлегә техниканың бер өлеше Теләчедә урнашкан, әмма без монда да инфраструктураны актив үстерәбез, – дип билгеләп үтте агроном.

Эшнең көйле баруыннан, районның авыл хуҗалыгы базарында яңа заманча хуҗалыкның киләчәге зур булуы күренә. Димәк, Питрәч кырларының тагын бер ышанычлы хуҗасы барлыкка килгән.