Питрәч районы социаль-икътисади күрсәткечләр буенча ТРда алтынчы урында тора

Район үзәгендә район Советы утырышы узды, анда 2025 елга районның социаль-икътисади үсешенә йомгак ясалды. Чарада Татарстан Республикасы Премьер-министрының беренче урынбасары Рөстәм Нигъмәтуллин катнашты.

Ул искә төшергәнчә, 2025 ел Ватанны саклаучылар елы һәм Җиңүнең 80 еллыгы эгидасы астында узды. Бу контекстта иң танылган чараларның берсе Советлар Союзы Герое Петр Гаврилов хөрмәтенә “Әлбәден” фестивале булды.

– Яшь буынга патриотик тәрбия бирүдә зур әһәмияткә ия булган фестивальне ел саен камилләштерүләре өчен оештыручыларга һәм муниципаль район җитәкчелегенә ихлас рәхмәтемне белдерәсем килә, – дип ассызыклады Рөстәм Нигъмәтуллин.

Ул шулай ук, 2026 елның Татарстанда Хәрби һәм хезмәт батырлыгы елы дип игълан ителүен әйтте. СВО башланганнан бирле республиканың 18 кешесе Россия Герое булды, шул исәптән Питрәч районында туган Иван Додосов. Утырышта аның әнисе һәм сеңлесе олы кунаклар буларак катнашты.

Район башлыгы Рәис Сөләйманов хәбәр иткәнчә, 2025 елда СВОда катнашучыларга һәм аларның гаиләләренә ярдәм итүгә аерым игътибар бирелгән. Җыелган гуманитар йөкнең гомуми суммасы 50 миллион сумнан артык тәшкил итә. Хәрбиләрнең гаиләләренә ярдәм итүгә 12 миллион сумга якын акча юнәлдерелгән.

Бөек Ватан сугышы ветераннары турындагы хәтерне саклау да район эшчәнлегенең мөһим юнәлеше булып кала бирә. Җиңүнең 80 еллыгы уңаеннан авыл җирлекләрендә һәйкәлләрне, янәшәләрендәге территорияләрне төзекләндерделәр һәм видеокүзәтү системалары урнаштырдылар.

Ел йомгаклары буенча Питрәч районы республика муниципаль берәмлекләренең социаль-икътисади үсеше рейтингында алтынчы урынны алды.

– Районның алга таба үсеш темпларын арттыру өчен бөтен мөмкинлекләр һәм ресурслар бар. Территориянең конкурент өстенлекләрен һәм башланган проектларны гамәлгә ашыру буенча актив эшне дәвам итүегезне сорыйм, – дип билгеләп үтте Татарстан Республикасы Премьер-министрының беренче урынбасары.

Икътисадның мөһим тармагы, бигрәк тә авыл территориясендә – авыл хуҗалыгы. “Ак барс- Питрәч” ҖЧҖ  иң зур ашлык һәм сөт җитештерүчеләрдән санала. Ит җитештерүнең төп күләме – 33179 тонна, шуның 96 проценты кош итенә туры килә. Төп җитештерүче булып “Ак барс” кошчылык комплексы тора.

Авыл хуҗалыгында уртача айлык хезмәт хакы 73000 сум тәшкил итә, әмма кайбер хуҗалыкларда ул түбәнрәк: “Гаврилов” ҖЧҖдә – 44 мең сумга якын, “Агролак” ҖЧҖдә – 33 мең сум. Рәис Әхтәмович җитәкчелеккә хезмәт хакы дәрәҗәсен яңадан карарга тәкъдим итте.

– Шәхси ярдәмче хуҗалыкларга консультация, техник һәм финанс ярдәмен дә кертеп, ярдәм күрсәтү буенча системалы эш оештыру мөһим, –  дип өстәде ул.

– Игенчелек һәм терлекчелек өлкәсендә омтылырлык урыннар бар. Авыл хуҗалыгының нәтиҗәлелеген күтәрү буенча системалы эшне дәвам итәргә кирәк, – диде Рөстәм Нигъмәтуллин.

Питрәч районы торак төзелеше темплары буенча республикада лидерларның берсе булып кала. 2025 елда 256,8 мең квадрат метрдан артык торак файдалануга тапшырылган, бу 107 процент тәшкил итә.

– Шул ук вакытта районда торак-коммуналь хезмәтләр өчен бурыч 95 миллион сумга җиткән. Халыктан җыелган түләүләр буенча муниципалитет соңгы урында тора, – дип хәбәр итте Рөстәм Нигъмәтуллин.

Медицина кадрлары белән тәэмин ителеш буенча район алдынгылар рәтендә: табиб кадрлары белән тәэмин ителеш 93 процент тәшкил итә. Туучылар саны күрсәткече лидерлыкны саклап кала: район халыкның табигый артуы буенча беренче урында тора.

Мәктәпләрдә педагоглар белән яхшы тәэмин ителгән. Шул ук вакытта 11 предметның сигезе буенча БДИның уртача баллы республикадагы уртача баллдан түбән булып кала, бу борчу тудыра.

– Һәр мәктәптә чыгарылыш укучыларын системалы әзерләүне тәэмин итүегезне сорыйм. Класс җитәкчесе ролен көчәйтүгә, ата-аналар белән хезмәттәшлекне активлаштыруга аерым игътибар бирергә кирәк, – диде Рәис Әхтәмович.

Рөстәм Нигъмәтуллин Рәис Сөләйманов белән бергә ТР “Электр челтәрләре” ДУП базасында булды, мәдәният сарае фойесында район предприятиеләре һәм оешмалары күргәзмәсен карады, анда аларның эшчәнлеге һәм яңа эшләнмәләре белән танышты.

Үз эшчәнлекләре турында беренчеләрдән булып чистарту корылмалары өлкәсендә эшләүче катнашучылар сөйләде. Җитештерү базасы Кощакта, офисы Казанда урнашкан. Биредә 17 кеше эшли, уртача хезмәт хакы 120 мең сум тәшкил итә.

– Без проектлаудан алып төзелешкә кадәр барысын да эшлибез, – дип сөйләде генераль директор урынбасары Тимур Габдрахманов. – Урын уңайлы, район безне хуплады, шуңа күрә предприятене Питрәч районында ачарга карар кылдык. Алга таба киңәергә телибез, шул рәвешле яңа эш урыннары да булдырачакбыз.

Кунакларны шулай ук Кощакта дизель генераторлары, икмәк-булка һәм камыр ризыклары җитештерү, Олан Илендә үсемлекчелекнең үсеше, “М7-Шәле” индустриаль паркы эше, Ленино-Кокушкинода “Ак барс” кошчылык комплексы” эшчәнлеге, Яңа Шигалидә торак комплекс төзелешенең барышы белән таныштырдылар.

Районның мәгариф, мәдәният һәм спорт өлкәсендәге казанышларына аерым игътибар бирелде. Бер мәйданчыкта “Профессионаллар” чемпионаты җиңүчеләре җыелды.

– Бу һөнәри юнәлеш бирү эше, көллиятләр һәм югары уку йортлары белән хезмәттәшлек, – дип аңлата Көектәге “Алгоритм” лицее директоры Лариса Глибина. – Алар үзләрен төрле һөнәрләрдә сынап карыйлар. Кайберләренең эш урыны әзер, балаларга вакансияләр тәкъдим итәләр.

10 нчы сыйныф укучысы Ясминә Мөхәммәтова – башлангыч сыйныфларда укыту буенча конкурс призеры. Аның инде үз мәктәбендә ачык дәресләр алып бару тәҗрибәсе бар.

– “Точка Б” мәктәп проекты ярдәмендә мин үземә якын булган һөнәрне билгеләдем. Минем максат – пединститутка укырга керү, башлангыч сыйныфларда укыту һәм балаларга белем бирү өчен безнең районга кайту.

Укучылар гына түгел, “Бәләкәч” балалар бакчасында тәрбияләнүчеләр дә үзләренең уңышларын күрсәттеләр. Алар чарага милли костюмнарда килгәннәр һәм кунакларны өйдә әти-әниләре белән бергә әзерләгән ризыклар белән сыйлаганнар. Катнашучылар арасында төрле милләт вәкилләре: руслар, татарлар, таҗиклар, керәшеннәр, үзбәкләр, марилар, азәрбайҗаннар һәм чеченнар бар иде. Аеруча да сабыйлар кунакларның күңелләренә хуш килде.

ФОТОРЕПОРТАЖ