Питрәч районы судьясы ярдәмчесе Алмаз Закиров үз һөнәре турында сөйләде

Алмаз Закиров Питрәч районында туып-үскән. Ленино-Кокушкино мәктәбен тәмамлагач, Казан дәүләт техник университетына көндезге бүлеккә укырга керә. Институтны тәмамлагач, туган районына кайта, авыл хуҗалыгы тармагында эшли. Суд системасында хезмәт эшчәнлеген 2007 елда Питрәч район судында мәгълүматлаштыру буенча баш белгеч вазыйфасыннан башлый.

– Район судында эшләү ошый, кызыклы, мавыктыргыч эш, – дип сөйли Алмаз Альберт улы. – Мин судья ярдәмчесе булырга теләдем, ләкин ул вакытта минем юридик белемем юк иде. Шуңа күрә 2010 елда Казан федераль университетына «Юриспруденция» белгечлеге буенча читтән торып укырга кердем.

2013 елда ул район суды администраторы вазыйфасына билгеләнә. 2014 елдан җәмәгать судьясы аппараты консультанты булып эшли. 2017 елда район суды судьясы ярдәмчесе вазыйфасында үзенең һөнәри дәрәҗәсен күтәрүне дәвам итә.

Судья ярдәмчесе – җаваплы вазыйфа. Юридик яктан дөрес һәм нигезле карарлар чыгару нәкъ менә аның тырышып эшләвенә бәйле.

– Юрист һөнәре – иң кызыклы һөнәрләрнең берсе, ул игътибарлылыкка өйрәтә, аналитик сәләтләрне үстерә. Бу сыйфатлар шәхси яктан да, һөнәри яктан да үсеш алырга ярдәм итә. Һөнәр белән кызыксыну беркайчан да сүнми, чөнки ниндидер яңа нәрсәләр турында даими белеп торасың законга кертелгән үзгәрешләрне күзәтәсең, – дип билгеләп үтә Алмаз Альберт улы.

Судья ярдәмчесе суд процессларын әзерләүдә һәм оештыруда ярдәм күрсәтә, суд актлары проектларын, судья адресына килә торган мөрәҗәгатьләргә һәм гаризаларга җавап проектларын әзерли, судьяның һөнәри эшчәнлегенә бәйле башка йөкләмәләрне үти. Судья ярдәмчесе булып эшләү өчен гамәлдәге законнарда, суд эшчәнлегенең теләсә нинди төрендә һәм эшләрне карау срокларында иркен ориентлашырга кирәк.

– Суд утырышына кадәр мин һәр конкрет очрак өчен норматив-хокукый база, суд практикасы материалларын сайлап алам, суд актлары проектларын төзим. Судья башкаруындагы суд эшләре (материаллар), гражданнар һәм оешмаларның мөрәҗәгатьләре буенча белешмәләрне дөрес итеп һәм үз вакытында кертәм. Моннан тыш, мин судның рәсми сайтында урнаштырылырга тиешле суд актлары текстларын деперсонализацияләүне гамәлгә ашырам. Судьяның эшләрне каравының процессуаль срокларын үтәвен һәм судьяның хәрәкәтсез калдырган карарларына карата гаризалар һәм апелляция шикаятьләре буенча җитешсезлекләрне бетерү срокларын тикшереп торам. Материаллар буенча якларга хәбәр белән кассацион судка җибәрергә әзерлим. Судья чыгарган шәхси карарларның үтәлешен тикшереп торам, кирәк була калса, искәртмәләр җибәрәм. Белемнәремне даими камилләштерергә, законнарга кертелә торган үзгәрешләрне күзәтергә һәм аларны эштә кулланырга мәҗбүр итә торган эшләрне карауда катнашам. Шулай ук судья кушуы буенча суд утырышлары беркетмәләрен алып бардым, суд утырышының барышын техник чаралар белән теркәүне контрольдә тотам, суд утырышында катнашырга тиешле затларның судка килүен тикшерәм, – дип санап китте Алмаз Закиров үз бурычларын.

Судья ярдәмчесе башка судлар, прокуратура, полиция бүлеге, суд приставлары хезмәте, төзәтү колониясе, район хакимияте белән тыгыз элемтәдә тора. Ул төрле мәгълүматны анализлый һәм гомумиләштерә белергә, норматив-хокукый актлар белән эшләргә, оператив карарлар кабул итәргә, яңа ситуациягә җайлашырга тиеш. Зур йөкләнеш шартларында үз вакытыңны дөрес бүлә белү мөһим. Хезмәт бурычы буенча ярдәмчеләр төрле кешеләр белән очраша, шуңа күрә алар конфликтлы ситуацияләрне булдырмау һәм оппонентлар белән «уртак тел» табу өчен нәтиҗәле аралашу алымнарына ия булырга тиеш.

– Хәзерге вакытта мин Питрәч район суды рәисе Әхмәтшин Марсель Рафикъ улы ярдәмчесе буларак беркетелгәнмен, аның җинаять эшләрен тикшерүче судья булып эшләү тәҗрибәсе зур. Ул үзенең тәҗрибәсе, профессионализмы, белеме белән минем белән уртаклаша. Теге яки бу ситуациядә киңәш бирә һәм юнәлтә, теге яки бу эш күләмен ничек дөрес эшләргә кирәклеген өйрәтә. Суд рәисенең бәяләп бетергесез тәҗрибәсен үз эшемдә кулланам, – ди Алмаз Закиров.

Судья ярдәмчесе булып эшләү – судья вазыйфасына таба иң киң таралган юлларның берсе. Судья итеп билгеләнү өчен кимендә 5 ел юридик стаж һәм квалификация имтиханы тапшыру кирәк. Судья ярдәмчесе булып эшләү тәҗрибәсе юридик карьерада, мәсәлән, адвокатурада, прокуратурада яки юридик оешмада старт булырга мөмкин.

Практикадан бер очрак

Хөкем ителүче күрше төбәктә башка җинаять эше буенча сак астында булган, аны суд утырышына озатырга кирәк иде. Моның өчен хөкем ителүче исәптә торган судтан рөхсәт сорарга, шуннан соң гомумән алганда дүрт этапта конвой эшен оештырырга кирәк булды. Телефон аша сөйләшүләр һәм оператив гамәлләр нәтиҗәсендә, гаепләнүче суд утырышына китерелде, гәрчә беренче карашка бу мөмкин түгел кебек тоелса да.

Гаиләсе

Алмаз Альберт улы өйләнгән, ике ул һәм бер кыз тәрбиялиләр.