Питрәч районында бөртекле һәм техник культураларны җыюны тәмамлыйлар

Бер үк вакытта басуларда салам пресслау, туңга сөрү, силос әзерләү бара.

Без бөртекле культураларны җыюга 3 августта керештек, - дип сөйли Татар Казысындагы «Макс-Ойл» хуҗалыгы идарәчесе Ирек Сабиров. - Бөртеклеләр бездә барлыгы 1250 гектар, шуның 50 гектарын көнбагыш биләп тора. Бөртекле культураларны суктыруга бер ай вакыт китте, гектардан уртача уңыш чыгышы 34 центнер тәшкил итә. Басуларда, ындыр табагында эшләүчеләрнең барысына да әфәрин генә дияргә кирәк! Безнең барлык игенчеләребез дә тырышып эшләделәр, - дип билгеләп үтте ул.

Хуҗалыкта барлыгы 4 комбайн уракка җәлеп ителде: 3 «Вектор 410» һәм 1 «Нова 340». 

Шулай ук 355 гектарда уҗым культураларын чәчүне дә вакытында төгәлләдек. Биредә Фәнис Сабиров К-742 тракторында «Фиат» чәчү комплексы белән эшләде, – дип уртаклашты Ирек Сабиров.

Авыл хуҗалыгы предприятиесенең төп юнәлеше – терлекчелек. Анда 676 баш мөгезле эре терлек асрыйлар, шуларның 165е савым сыерлары. Һәр сыердан тәүлеклек савым 24-25 килограмм тәшкил итә. Алар өчен 4500 тонна сенаж һәм 1000 тонна печән әзерләнгән, 2000 тонна силос салу планлаштырыла. Аграрийлар, быел кукуруз уңышы сөендерә, диләр.

6 сентябрьгә бөртекле һәм техник культуралар 93,5 процентка җыеп алынды. Бөртекле культураларның гектардан уртача чыгышы 31,1 центнер тәшкил итә. Кайбер крестьян-фермер хуҗалыкларында урып-җыюны тулысынча төгәлләделәр. Зур хуҗалыклар да финишта, бары тик техник культуралар гына калып бара. «Шәле-Агро»да гектардан уртача уңыш чыгышы 39 центнер, «Макс Ойл»да – 97% һәм 34 центнер, «Ак Барс-Питрәч»тә – 90% һәм 32 центнер, Гаврилов хуҗалыгында – 90% һәм 37 центнер, «Питрәч Агрохим»да – 100% һәм 47,5 центнер.