Питрәч районында гражданнар җыеннары дәвам итә

Гражданнар җыеннары хакимият һәм халык арасында ачык диалогның төп мәйданчыгы булып кала. Монда нәтиҗәләр ясыйлар, карарлар кабул итәләр һәм киләчәккә планнар коралар. Район башлыгы Рәис Сөләйманов билгеләп үткәнчә, нәкъ менә шундый очрашулар кешеләрне ишетергә һәм аларның сорауларына оператив җавап бирергә мөмкинлек бирә.

Павел Егоров, Екатериновка җирлеге башлыгы:

– Екатериновкада кече бизнес үсә башлады: 9 эшмәкәрлек субъекты уңышлы эшли.

3 миллион сумлык грант алган Рафаил Фәрхетдинов крестьян-фермер хуҗалыгы 5 гектарда бакчачылыкны үстерүен дәвам итә. Әлфинә Мөхәммәтшина ИП атчылыкта уңышларга ирешә. Узган ел безнең җирлек өчен бик күп уңай үзгәрешләр китерде: яңа МТЗ-82.1 тракторы сатып алынды, 3 километрдан артык юлларга вак таш түшәлде. Нептунда һәм Урта Дәүләтъярда сугыш геройларына яңа һәйкәлләр барлыкка килде. Куркынычсызлыкны яңа янгын гидрантлары тәэмин итә, контейнер мәйданчыклары куйдык. Администрациянең яңа бинасы төзелә башлады. Үзара салым акчасына биш урамдагы юллар тәртипкә китерелде. Тройсын чиркәвен саклап калу буенча эшләр дәвам итә. Волонтерлар һәм президент гранты ярдәмендә борынгы чиркәүне торгызу эшләре бара.

Наталья Поповская, Колай җирлеге башлыгы:

– Безнең җирлектә 89 баш мөгезле эре терлек, мең ярымга якын кош-корт бар. Барлык терлекләр дә вакцинация узган. Шәхси ярдәмче хуҗалык тотучылар 332 мең сумнан артык субсидия алдылар. Ике гаилә, Корнеевлар һәм Бурхоновлар, зур ярдәм алдылар – мини-фермалар төзүгә 600әр мең сум. 2025 елда бездә күп фатирлы йортның түбәсенә капиталь ремонт ясалды, Арышхаздада урамга асфальт җәелде, яңа гидрантлар һәм контейнер мәйданчыклары урнаштырылды. Җиңү көненә яңа һәйкәл төзелде. Үзара салым программасы яхшы эшләде: җыелган 668 мең сум 4 миллионга әверелде, ул биш торак пункттагы юлларга һәм яктыртуга тотылды.

Альбина Габдуллина, Питрәч авыл җирлеге башкарма комитеты җитәкчесе вазыйфаларын башкаручы:

– Питрәч барлык юнәлешләрдә дә үсә. Эшмәкәрләр саны арта, яңа җитештерүләр ачыла: “Сыйлан” ит ярымфабрикатлары федераль челтәрләргә җибәрелә башлады, яңа заманча кибет барлыкка килде. Әмма иң мөһиме – инфраструктураны масштаблы яңарту. Юлларга 221 миллион сумнан артык акча тотылды – 22 урам ремонтланды. Илкүләм проект буенча 8 километр яңа суүткәргеч сузылды. Йортларга капиталь ремонт ясалды, Шихаздада ФАП төзелде, яшь өйләнешүчеләр паркын яңарту башланды. Мәдәният сарае, хәрби комиссариат һәм полиция биналары яңартылды. Мишә ярларын ныгыту эшләре башкарылды, бу эш дәвам итәчәк. Меңнәрчә роза утыртылды. Быел Мелиораторлар урамындагы 3 нче һәм Казанская урамындагы 2 нче йортларга капиталь ремонт ясалачак. Спорт мәктәбе һәм боз сарае биналарын ремонтлау, “Акчарлак” балалар лагерын реконструкцияләү һәм Питрәч авылының 6 урамында юлларны ремонтлау көтелә. Шулай ук Төзүчеләр урамындагы күперне ремонтлау да планлаштырылган.

Ленар Хәбибуллин, Шигали җирлеге башлыгы:

– Үзара салым программасы Иске һәм Яңа Шигали авылларында юлларга вак таш җәю мөмкинлеге бирде. Яңа контейнер мәйданчыгы төзелде, балтырганга каршы ныклы көрәш бара – 50 гектар эшкәртелде. Сәүдә һәм хезмәт күрсәтү өлкәсендә бездә дистәләгән объект эшли. Халык соравы буенча зур эш башкарылды: эт аулау, яктырткычларны ремонтлау, чүп-чар чыгару. Шәхси ярдәмче хуҗалыкларда да уңышлар бар: бер гаилә кече ферманы үстерү өчен ярты миллион сум грант алды. Быел мәктәпкә капиталь ремонт, яңа контейнер мәйданчыклары һәм куркыныч чүп үләннәренә каршы көрәшне дәвам итү планлаштырыла.