Питрәч районында палаткалы лагерьда 200 бала ял итте

Фото: © Люция Сираҗиева / «Питрәч-информ»

Районда “Крепость” җәйге хәрби-патриотик лагере эшен уңышлы төгәлләде. Бу сезонда балалар ике мавыктыргыч сменада катнаштылар. Һәркайсы җиде көн дәвам итте һәм 10 яшьтән алып 17 яшькә кадәрге 100шәр малай һәм кызны җыйды.

Лагерьда яшәү кыр шартларына яраклаштырылган иде, бу балаларга уникаль тәҗрибә бүләк итте. Алар иркен палаткаларга урнаштылар. Балалар өчен барлык кирәкле шартлар тудырылган: юынгычлар, бәдрәфләр оештырылган, даими рәвештә кайнар ризык китерелгән. Иң мөһиме – балалар бөтен вакытларын саф һавада, табигатьтә, гаджетсыз үткәргән, бу хәзерге заманда аеруча кыйммәтле. Күп кенә балалар беренче сменадан соң икенче сменага калырга теләк белдерделәр.

– Быел эш “Алдынгылар хәрәкәте” җирле бүлекчәсе белән берлектә оештырылды, – дип сөйләде лагерь сменасы башлыгы Светлана Хәбирова. – Безгә беренче медицина ярдәме күрсәтү, автоматны сүтеп-җыю буенча мастер-класслар үткәрергә килделәр, без хәрби-патриотик кино карадык. Сменалар бик яхшы үтте, – диде ул.

Лагерьда катнашучылар янына соңгы көнне “Форпост” үзәге вәкилләре килде. Алар балалар өчен берничә тематик станциядән торган квест үткәрделәр. Балалар автоматны сүтеп-җыюда, атуда, граната ыргытуда һәм каршылыкларны узуда үз көчләрен сынап карадылар. Шундый станцияләрнең берсенә юл күрсәтүче Саимә Шаһиәхмәтова җитәкчелек итте.

– Мин каршылыклар полосасын үткәрдем, анда без зыян күрүчеләргә беренче ярдәм күрсәтергә өйрәндек. Төрле җәрәхәтләр була: кемнеңдер аягында кан ага, кемнеңдер аягы сынган. Күп кенә командалар биремнәрне уңышлы үтәделәр, һәм минем уйлавымча, нинди дә генә хәл булса, алар бер-берсенә ярдәм итә алачак, – дип уртаклашты Саимә.

Казаннан Ләйлә Баһирова ялдан алган тәэсирләре белән уртаклашты. Кыз күптән инде “Крепость”ка эләгергә хыялланган булган.

– Питрәч районына әбием янына кайткач, дусларымнан лагерь турында белдем. Быел монда бару мөмкинлеге барлыкка килде. Мин беренче сменада да булдым, ул иң яхшысы иде. Күңелле булды, әйбәт юл күрсәтүчеләр, тәмле ризык, – диде Ләйлә.

Балалар өчен лагерь бөтенләй бушлай иде. Бу ял җәйге каникулларда яңа тәэсирләр алып килде, яңа дуслар бүләк итте һәм мөһим күнекмәләргә өйрәтте.