Питрәч районында туып үскән егетне Жуков медале белән бүләкләделәр

Хәрби бурычын үтәгәндә күрсәткән батырлыклары һәм фидакарьлеге өчен Питрәч районыннан Валерий Максимов РФ Дәүләт бүләге - Жуков медале белән бүләкләнде.

Валерий П.В. Дементьев исемендәге Казан авиация-техник колледжы филиалында укыганда «Форпост» хәрәкәте активисты булган.
- Ул бик җаваплы, тырыш егет. Аның кулыннан килмәгән эше юк. Ул безгә дә, әти-әнисенә дә һәрвакыт ярдәм итте. Кайвакыт төзелештә дә эшләп алды, бөтен эшне дә белә, - дип сөйләде аның турында «Форпост» МБУ директоры Наилә Таҗиева.
Хәзер ул Украинада махсус хәрби операциядә катнаша. Элек контракт буенча хезмәт иткән, әмма аның срогы тәмамлангач, хезмәттәшләре белән бергә алгы сызыкта кала. Харьков өлкәсенә һөҗүм вакытында ул иптәшләре белән алгы сызыкта баралар, шуның нәтиҗәсендә тыныч халыкны Россия территориясенә алып чыгалар.

Сүз уңаеннан, Жуков медале һәм ордены — хәзерге Россиянең беренче аерымлык билгеләренең берсе. Алар фашист Германиясен җиңүдә төп катнашучыларның берсе булган бөек полководецның тууына 100 ел тулуга багышланган.

Жуков медале белән хәрби хезмәткәрләр Ватанны һәм Россиянең дәүләт мәнфәгатьләрен саклаганда хәрби хәрәкәтләрдә күрсәткән батырлыклары, фидакарьлекләре һәм шәхси батырлыклары, хәрби хезмәттә, хәрби кизү торуда һәм өйрәнүләрдә һәм маневрларда катнашканда аерым батырлыклары, хәрби әзерлектә яхшы күрсәткечләре өчен бүләкләнәләр.