Питрәч районында алкоголь сату кимегән, ләкин агулану очраклары арткан

ТР Дәүләт алкоголь инспекциясенең Казан территориаль органы башлыгы Марина Егорова Питрәч районында 2025 елның 7 ае нәтиҗәләре турында хәбәр итте.

Узган елның шул ук чоры белән чагыштырганда куәтле алкогольне ваклап сату күләме 3 процентка, ә сыра продукциясе, киресенчә, 1 процентка арткан. Көчле алкоголь продукциясен куллану кимүенең сәбәбе ваклап сату бәяләренең сизелерлек артуы булырга мөмкин.

Алкоголь продукциясен куллануга анализ, беренче чиратта, сыйфатлы легаль продукция куллануны контрольдә тоту максатыннан үткәрелә. Бу эш кысаларында ТР Дәүләт алкоголь инспекциясе хезмәткәрләре хокук бозуларны ачыклау һәм булдырмау өчен төрле профилактик чаралар оештыра. “Үзара хезмәттәшлек”тән башка чаралар барышында ачыкланган хокук бозулар фактлары буенча эшмәкәрләргә һәм юридик затларга мәҗбүри таләпләрне бозу турында 57 кисәтү игълан ителде.

Хуҗалык итүче субъектлар өчен даими рәвештә белемне күтәрү буенча семинарлар үткәрелә, аларда гамәлдәге законнар нормалары һәм соңгы үзгәрешләр аңлатыла. Алар арасында: 2024 елның 1 июненнән кертелгән күп фатирлы йортларда (рестораннардан тыш) җәмәгать туклануы предприятиеләре өчен алкоголь сату вакытын чикләү — 10:00 дән 22: 00 гә кадәр. Шулай ук 2025 елның 1 мартыннан балигъ булмаганнарга алкогольсез тонизирлаучы һәм энергетик эчемлекләр сату тыела.

Күрелгән чараларга карамастан, алкоголь белән агулануның 7 очрагы теркәлгән, шул исәптән 4 очрак үлем белән тәмамланган. Узган ел белән чагыштырганда күрсәткечләр начарайган, ул вакытта 3 агулану очрагы теркәлгән, шуларның 2се үлем белән тәмамланган. Шуңа бәйле рәвештә, район халкын алкоголь әйләнеше өлкәсендәге законнарны бозуның барлык фактлары турында җирле үзидарә органнарына, Эчке эшләр органнарына һәм ТР Дәүләт алкоголь инспекциясенә вакытында хәбәр итәргә чакыралар. Шулай ук алкогольне барлык документлары булган лицензияле кибетләрдә генә сатып алырга һәм кулдан, санкцияләнмәгән нокталарда сатып алудан качарга киңәш итәләр.

2025 елның 1 августына 145 сәүдә объектында 55 юридик зат алкоголь продукциясен сата. Сыра һәм сыра продукциясе 200дән артык сәүдә ноктасында сатыла.