Питрәч районыннан СВО ветераны: “Безнең өчен дога кылган һәркемгә рәхмәт”

“Җиңү белән кайтырмын, шуннан соң тагын бер мәкалә язарсың”, – дип әйткән иде миңа Ильхом 2023 елда, мин аның белән әңгәмә корганда. Ул вакытта ул яраланып кайткан иде, һәм без язмабызга аның цитатасын баш исем итеп бирдек, аларның һәрберсе өчен бөтен ил дога кыла. Бүген безнең герой аның гомерен шушы догалар саклап калганга ышана. “Барыгызга да бик зур рәхмәт. Яхшылыгыгыз үзегезгә әйләнеп кайтсын”, – диде ул укучыларыбызга.

Ильхом махсус операциядә үз юлын электроник позывное белән уза, элемтә башлыгы, мотоукчылар батальоны взводы командиры дәрәҗәсенә җитә. Ике тапкыр яралана – икенчесендә аеруча каты тән җәрәхәтләре ала, шуннан соң аны демобилизациялиләр. Соңгы тапкыр яраланган вакытта Ильхомга лейтенант исеме бирелгән була инде.

– Бу 2024 елның 8 апрелендә булды, – дип сөйли СВО ветераны. – Безнең позицияләргә һәм команда пунктына ут ачтылар, шуның аркасында батальон белән полк арасында элемтә өзелде, өстәвенә команда пункты белән роталар арасында элемтә югалды.

Ул элемтәне торгызу өчен үз кул астындагыларга бурычлар билгели. Алдагы позицияләрдәге команда пунктына кадәр элемтәне торгызырга үзе китә. Кичке алтылар тирәсе, караңгы төшкән чак була. Тиешле урынга кадәр 300 метр ара калганда аны дошманның ике дроны күреп ала. Аның өстенә җибәрелгән өч граната көчле җил аркасында ераккарак төшеп, элемтәчегә зыян китермичә шартлый. Ул көчкә яшер енеп кала. Китәргә кирәклеген аңлап, чыгып йөгерә, өч-дүрт метр чамасы йөгереп баргач, көчле шартлау була, шуннан соң ул аңын югалта.

– Аңыма килгәч, күземне ачсам – караңгы, йомсам да, караңгы, – дип искә ала Ильхом. – Мин исәнме соң, дип уйлап куйдым. Башым шаулый, кәстрүл белән сукканнар диярсең. Аннары дары исе сиздем – үземнең исәнлегемне аңладым. Бу хәлнең ничек булганын аңларга тырыштым. Дошманның янәшәмдә генә булуы мөмкин иде, шуңа күрә мин үлгәнгә салышып яттым.

Соңыннан ул рация фонаре белән үзен карый һәм күп кан югалтуын, монда калырга ярамаганлыгын аңлый. Жгут сала һәм атларга тырышып карый, ләкин егыла – аягы йөрми. Шуыша башлый. Шулай итеп, яралы егет техника саклана торган урынга кадәр километр ярым чамасы юл үтә. Аннан рация буенча үзенең “өч йөзенче” булуын хәбәр итә, һәм тиздән аны эвакуациялиләр.

Дәвалану ел буе дәвам итә. Шул вакыт эчендә Ильхом сигез госпитальдә була. Өенә гыйнвар ахырында гына кайта, ул Царевода яши. Аягын саклап калалар, ләкин нервлары тернәкләнми – аягының сизгерлеге юк, аяк табаны начар күтәрелә. Хәрби хезмәткәр сәламәтлеге торышы буенча запаска җибәрелгән.

– Сәламәтлегем Аллаһка шөкер, барысы да яхшы, – дип ышандыра ул. – Йөрим бит, кайчак аксасам да, үз аякларым белән йөрим, бу иң мөһиме.

Дәүләт ветеранга ярдәм итә: сентябрьдә ул Мәскәү өлкәсендә реабилитация курсы узган, мартта Хакасия Республикасына оча. Аны массажлар, физиотерапия, ЛФК көтә – барысы да аны аякка бастыру өчен. Ильхомны барлык сезон өчен ортопед аяк киеме һәм аяк табанын тотып тору җайланмасы белән тәэмин итәләр.

Кайткач, бер атнадан ул электроника ремонтлау буенча остаханә ача – бу аның СВОга кадәр ачкан эше. Җәлил урамындагы 9 нчы йортта арендага бина ала, җиһазлар алып кайта һәм яңадан кулына паяльник тота. Шунысы кызык, 2022 елда махсус хәрби операция зонасына киткәндә, исән кайтаммы-юкмы дип, барлык җиһазларын саткан була. Ләкин моннан бер ай элек белдерү игълан иткәч, кешеләр беренче көннәрдән үк аның янына агыла башлый. Бүген ул, шимбә һәм якшәмбедән тыш, көн саен ремонт белән шөгыльләнә.

– Клиентларым кире минем янга килә, мине беркем дә онытмаган, минем кайтуыма һәм яңадан эшкә керешүемә алар бик шат. Миңа электроника белән бәйле күп кенә проблемалар белән мөрәҗәгать итәләр, – дип сөйли оста.

Ильхом “Батырлык өчен”, Суворов, “Хәрби батырлык өчен”, “Сугышчыэлемтәче” медальләре белән бүләкләнгән. Асылда, хәзер дә ул шул ук функцияне башкара – кешеләр арасында элемтә торгызырга ярдәм итә. Бу элекке тормышка кайтырга да, авыр хатирәләрдән арынырга да ярдәм итә.

– Мин исәннәр рәтендә булуыма чын күңелдән шатмын. Мин Аллаһка рәхмәтлемен, ул миңа һәр иртә уянырга, эшләргә, үз гаиләм һәм якыннарым белән һәр көнгә шатланырга мөмкинлек бирде.