Питрәч телемастеры: «Элек телевизорның авырлыгы 70 килограмм иде»

Егор Григорьевич балачактан техникага тартылган, бигрәк тә Мәскәү һәм Казанны күрсәтә торган могҗизалы тартмага.

ЯШҮСМЕР ЧАКТА РАДИОАЛГЫЧЛАР ҖЫЙГАН, КИНОАППАРАТУРА РЕМОНТЛАГАН

- Без бөтен урам белән телевизоры булган кешенең йортында җыела идек. Хуҗалар безне бик теләп керттеләр. Кем урындыкта, кем идәндә утыра, фильмнар, мультфильмнар һәм башка тапшырулар карадык. Ул вакытта, әлбәттә, сурәтләр сыйфаты алай ук яхшы түгел иде, һәм алар аклы-каралы гына иде, - дип искә төшерде язмам герое.

Егор күршесе һәм дусты Слава Данилов белән шул вакытта радиотехника белән мавыга башлаган. Бергәләп радиоалгыч җыйганнар, алар аша музыка тыңлаганнар. Ул вакытта танылган «яшь конструктор» җыелмасы ярдәмендә кечкенә радиоалгычлар һәм башка аппаратураларны үз куллары белән җыйганнар. Соңрак егетләргә җирле кино челтәрендәге киноаппаратын ремонтлауны ышанып тапшыра башлаганнар. Күршеләре дә еш кына аларга көнкүреш техникасын төзәтү үтенече белән мөрәҗәгать иткән. Озакламый ике дус берберсенең өенә телефон керткән, соңрак башка дусларына да. Бу талантлы егетләр Пушкин урамында яшәгәннәр. Шул ук вакытта алар фотографиягә төшерү белән дә мавыга башлаганнар. ФЭД-4 фотоаппаратын, фотозурайткыч, фотоларны бастыру өчен башка кирәк-яракларны сатып алганнар. Алтмыш ел элек төшерелгән беренче фотолары әле дә гаилә альбомында саклана.

«ТЕЛЕВИЗОРНЫҢ АВЫРЛЫГЫ 70 КИЛОГРАММ ИДЕ»

Шулай да техника Егор Федотовның күңеленә якын була. Тиздән аларның өендә «Спутник-61» телевизоры барлыкка килә. Алар аны Слава белән тулысынча сүтеп җыялар. Әти-әниләре улларының мавыгуларына комачауламый. Ул Питрәчтә туып-үскән. Әтисе Григорий Дмитриевич ат караучы, әнисе Елизавета Алексеевна теплицада бакчачы булган. Егор нинди һөнәр сайлыйм икән дип баш ватмаган. Ул үз язмышын радиотехника белән бәйләргә, дигән ныклы карарга килгән.

– Безнең сыйныф көчле иде. Югары белем алганнан соң сыйныфташларымның күбесе җитәкче вазифаларда эшләделәр. Ә мин югары уку йортында укудан баш тарттым, сайлаган хоббига тугры калырга һәм телемастер булып эшләргә теләдем. Гаврилов урамында урнашкан Питрәч КБОсына эшкә урнаштым, - диде әңгәмәдәшем.

Аны шунда ук эшкә алганнар. Ул вакытта мондый осталар аз булган. Ул берүзе була. Шуңа күрә квитанцияләрне дә үзе тутыра, акчаны да кассага үзе тапшыра. Дәрвишләр бистәсенә запас частьләр алырга да үзе бара, заказлар буенча да йөрергә өлгерә. Ул вакытта иң популяр телевизорлар «Спутник», «Волхов», «Заря», «Радий» маркалары була, ә соңрак «Рекорд» барлыкка килә.

Армиядә ул радиостанцияне ремонтлау буенча махсус частьта хезмәт итә. Демобилизациядән соң туган авылына Совет урамындагы элеккеге КБО бинасындагы остаханәгә кайта. Аңа кадәр берничә кеше телемастер булып эшләп караган, ләкин аларның берсе дә, төрле сәбәпләр аркасында, озак тоткарланмаган. Гаврилов урамындагы төп бинаны реконструкцияләгәннән соң, бүлмәләр тагын да иркенәеп, көнкүреш техникасын, запас частьләрне саклау урыннары барлыкка килә.

Сиксәненче елларда көнкүреш хезмәте комбинаты көчле тармак була, анда өс киеме, аяк киеме, көнкүреш техникасы ремонтлыйлар, тегү һәм бәйләү цехлары эшли, фотога төшерәләр. Телевизор ремонтлауда 7-8 оста эшли. Телевизор, магнитофон, автомагнитола һәм башка аппаратура әкренләп һәр йортта пәйда була, шуңа күрә заказлар да арта бара.

- Мин атнасына дүрт көн Шәле, Күн, Керәшен Сәрдәсе һәм Янсуар авылларына беркетелгән участокларга бара идем. Бар җирдә дә эш күп иде. Ә җомга һәм шимбә көннәрендә үзебезнең остаханәдә эшли идем. Катлаулы ремонт таләп ителсә, техниканы Питрәчкә алып китә идек. Безнең остаханәдә шартлар әйбәтрәк иде, ватылуның сәбәпләрен берничә сәгать ачыклап, запчастьләрен алыштыра идек. Беренче вакытларда төсле телевизорларның авырлыгы 70 килограмм иде, шундый авырлыкны күтәреп ташый идек. Аппаратның озак еллар хезмәт итәчәгенә үзебез ышангач кына, кабул итү пунктына җибәрә идек, - диде ул.

Заманалар үзгәрә, төсле телевизорлар, чит ил техникасы пәйда була. Егор аларны интернет, китаплар буенча рәтләргә, көйләргә өйрәнә.

- Хәзер күбесенчә платалар сафтан чыга. Аларны тулысынча алыштырабыз. Техниканы яхшы белсәң, ремонтлау буенча бернинди проблема юк. Беренче карашка гына бу авыр кебек тоела, - дип билгеләп үтте элеккеге оста.

КАТЛАУЛЫ МЕДИЦИНА АППАРАТУРАСЫНА ХЕЗМӘТ КҮРСӘТКӘН

1973 елда Егор Григорьевич Надежда Матвеевнага өйләнә, ул соңрак КБОга кассир булып урнаша. Ир белән хатын ике ул тәрбияләп үстерәләр, алар Гадәттән тыш хәлләр министрлыгында эшлиләр. Кече уллары Владимир да буш вакытында техника ремонтлау белән шөгыльләнә.

КБО ябылганнан соң, Егор Федотов район үзәк хастаханәсенә катлаулы медицина аппаратурасын ремонтлаучы һәм аларга хезмәт күрсәтүче булып эшкә урнаша. Лаеклы ялга да шуннан чыга.

Егор Григорьевичка 70 яшь. Ул актив тормыш алып бара, яшелчә бакчасында эшләргә ярата. Үз хоббие турында да онытмый. Барысына да үзлегеннән өйрәнгән оста хәзер дә беркемне дә кире какмый. Ул теләсә нинди көнкүреш техникасына яңа тормыш бирергә әзер. Ул мото, автотехниканы да яхшы белә. Дуслары, күршеләре аңа мөрәҗәгать итәләр, ә ул моңа шат кына, чөнки ул эшсез утырырга күнекмәгән. Аның янына еш кына элекке коллегалары килә, ә алар белән искә төшерерлек вакыйгалар аз түгел