Питрәч хастаханәсенең һәм районыбызның сәламәтлек саклау тармагының тарихыннан

1978 ел. Район үзәк хастаханәсенең педиатрия бүлеге коллективы. / Фото хастаханә архивыннан

1928 елда Питрәч хастаханәсе төзелгәннән соң беренче елларда район балаларына фельдшерлар, акушеркалар, табиб-терапевтлар ярдәм итә. Безнең хастаханәнең беренче бинасында (чүлмәк остаханәсе) балалар өчен койкалар бүлеп бирәләр.

Табиб-педиатрлар турында аерым белгечләр буларак 1939 елдан бирле генә искә алына. Алар Стефановская София Ивановна һәм Бурцева Зоя Петровна. Ул беренче булып оештырылган хатын-кызлар-балалар консультациясен җитәкли. 1941 елда аны Питрәч хастаханәсе мөдире итеп билгелиләр.

Әмма сугышның беренче көннәреннән үк медиклар фронтка китә. Өстәвенә, беренчеләрдән булып безнең районның дәвалау учреждениеләре җитәкчеләрен мобилизациялиләр: 24 июньдә – Пановкада 3 нче төзәтү колониясенең медсанчасте башлыгы һәм бер үк вакытта Пановка хастаханәсе фельдшеры Петрушин Георгий Иванович. Июль аенда З.П.Бурцева, Рус Казысы хастаханәсе мөдире Медникова Антонина Павловна, Пановка хастаханәсе мөдире Нина Георгиевна Школьникова фронтка китәләр.

Районда 1947 елдан гына педиатрия хезмәте формалаша башлый. Районга килгән яшь педиатр Ермолаева Людмила Борисовна инициативасы белән беренче тапкыр балалар консультациясе оештырыла. Аны авыл үзәгендәге район башкарма комитеты каршындагы агач бинага урнаштырганнар (хәзерге социаль яклау бинасы). Элеккеге балалар консультациясе урынында хәзер балалар спорт мәктәбе урнашкан.

1948 елда бу бина хастаханә территориясенә күчерелә. 1965 елда поликлиниканың яңа төзелгән бинасында балалар консультациясе өчен аерым керү урыны булган тулы бер мәйдан бүлеп бирелә. Аннары биналарда кирәкле барлык җыелмалар белән бала тудыру һәм балалар бүлекләре өчен яңа бина төзелә. 1948 елда Людмила Борисовна инициативасы белән Питрәчтә Новая урамында Афанасьева Людвига Владиславовна йортында беренче сөт кухнясын ачалар, ул беренче диетик шәфкать туташы була. Соңыннан ул озак вакыт даруханәдә эшли, чөнки белеме буенча фармацевт була.

Балалар консультациясе хезмәткәрләре Питрәч, Олан Иле, Шихазда, Пашня, Черемыш авыллары балаларына хезмәт күрсәтәләр. Балалар патронажына ат белән дә, җәяү дә, кайчакта төн кунарга калып та баралар. Педиатрия хезмәте барлыкка килгән чорда районда балалар сәламәтлеге белән бәйле хәл бик катлаулы була. Сабыйлар үлеме югары дәрәҗәдә була – яңа туган 1000 балага 108 очрак. Балалар инфекцияләре көчәйгән була. Нәкъ менә шул чорда Людмила Борисовна, балаларга ярдәм иткәндә йоктырып, үзе дифтерия белән авырый. Ул вакытта авыздан дифтерия пленкаларын суырып алу ысулы була.

1960 нчы еллар. Педиатр Ермолаева Людмила Борисовна кечкенә пациент белән таныша. / «Питрәч-информ»

Ситуация хастаханәнең балалар консультациясе коллективы, фельдшер-акушерлык пунктлары, вакцинация, патронаж үткәрү буенча балалар бүлеге хезмәткәрләренең төгәл оештырылган эше, авыру балаларны, бигрәк тә бер яшькә кадәр, вакытында хастаханәгә салу нәтиҗәсендә яхшыра. 1960 елда ук сабыйлар үлеме күрсәткече ике тапкырга кими, 1975 елда – дүрт тапкырга. Чагыштыру өчен, хәзерге вакытта бу күрсәткеч яңа туган 1000 балага өч-алты тирәсе.

Документларда беренче тапкыр патронаж шәфкать туташлары турында 1939 елда телгә алына – бу Кирсанова А. һәм Сабирова. Людмила Борисовнаның балалар консультациясендә иң беренче ярдәмчесе Елизавета Оспенникова була. Алар бергә 20 ел эшлиләр. Елизавета Кирилловна белемле шәфкать туташы, яхшы остаз була, соңыннан үз тәҗрибәсен Ермолаева Мария Яковлевнага, Пигасова Вера Федоровнага, Барлева Нина Георгиевнага, Исупова Маргарита Григорьевнага тапшыра. Алар барысы да озак вакыт педиатрия хезмәтендә эшләделәр.

Ә балалар бүлеге коллективында ветераннарыбыз Захарова Мария Григорьевнаны, 31 ел хезмәт иткәннән соң 10 ел бүлекчәнең өлкән шәфкать туташы булып эшләгән Чернова Римма Васильевнаны, Низаметдинова Хәдичәне, Корочкина Александра Ивановнаны, Леонтьева Валентина Ивановнаны телгә алмыйча булмый. Алар барысы да микросимптомнар буенча баланың халәтендәге үзгәрешләрне күрә белә алган. Һәм, әлбәттә, кечкенә пациентка һәм аның әти-әнисенә яхшы мөнәсәбәт күрсәтүе белән аерылып торган.

Питрәчлеләрнең берничә буыны Людмила Борисовнаның оста куллары аша уза, ул әле чын шәфкать иясе дә, үз кызын һәм тәрбиягә алган улын ялгызы үстерә. Пенсиягә чыккач, Питрәч коррекция мәктәбендә педиатр булып эшләвен дәвам итә.

1970 елда аңа “ТАССРның атказанган табибы” дигән мактаулы исем бирәләр.