Питрәчле ни өчен СВОга барырга карар кылуы турында сөйләде

Фото: © Люция Сираҗиева / «Питрәч-информ»

Алексей Костюнин Карповка авылыннан, аңа 53 яшь. Ул Колай мәктәбен тәмамлаган, аннары Ленино-Кокушкино училищесында шоферлыкка укыган. 1992 елда Красноярскта бронетанк гаскәрләрендә кече сержант дәрәҗәсендә хезмәт иткән, бүлек командиры булган.

Ир-ат үзен өлешчә мобилизация буенча чакырырлар дип уйлаган, моңа әзер булган, ләкин повестка килмәгән. Шуннан соң ул үз теләге белән барырга карар кылган, ләкин башта улының армиядә хезмәтен тәмамлап, өенә кайтканын көткән. Хәзер инде улы кайткан, Алексейның өйдә калдырырлык кешесе бар. Ул тол ир-ат, аның ике игезәк баласы инде зурлар, алар әтиләренең карарын хуплаган.

– Мин үз Ватанымны яратам. Ә Ватан – ул балалар, гаилә, әти-әни, – дип аңлатты ул үзенең бу карарын.

Узган атнада Алексей документлар рәсмиләштерү белән шөгыльләнгән. Питрәчтә чиратсыз медицина тикшерүе узган, һәр этапта аны махсус хезмәткәр озатып йөргән. Әлегә кайда һәм кем булып хезмәт итәчәген белми, әмма кәефнең сугышчан булуын таный. Яшьләргә караганда зуррак, тәҗрибәлерәк ир-атлар сафка басарга тиеш, дип саный.

– Анда мин түгел, әнә теге барсын, бу барырга тиеш дигән фикер юк миндә. Һәркем үзе хәл итә, – дип билгеләп үтте ул.

Татарстан контрактчыларга түләүләр буенча Россия төбәкләре арасында лидерларның берсе. Питрәч районы хәрби комиссариатында контракт төзегәннәргә бер тапкыр 3,4 млн сум түлиләр. Бу сумма түбәндәгечә туплана: 400 мең сум – РФ Оборона министрлыгыннан, 2,7 млн сум – Татарстан Республикасыннан һәм 300 мең сум – Питрәч районыннан.