Питрәчле Рузил Гайнуллин: «Комбайнчы һөнәре һәрвакыт мактаулы»

«Ак Барс-Питрәч» хуҗалыгыннан Рузил Гайнуллин Сарман районында узган «Хезмәт кешесен данлыйбыз» республика күләмендәге һөнәри осталык конкурсында уңышлы чыгыш ясады.

Конкурска бөтен республикадан урып-җыю барышында иң күп ашлык суктырган иң яхшы яшь комбайнчылар килде. Аларга ике җитди сынау үтәргә туры килде: башта 30 тест соравына җавап биреп, теоретик белемнәрен сынадылар, аннары автопаркта практик белемнәрен күрсәттеләр.

Рузил Гайнуллин катнашучы дипломы, РФ агросәнәгать комплексы хезмәткәрләре һөнәр берлегенең Татарстан Республика комитетының Рәхмәт хаты белән бүләкләнде, шулай ук «Агроинженерия» юнәлеше буенча Казан дәүләт аграр университетына укырга керү өчен сертификат алды. Аның инде югары юридик белеме бар, ә хәзер исә техник белгечлек алу мөмкинлеге барлыкка килде.

Мондый әһәмиятле чарада Питрәч районын тәкъдим итү мөмкинлеге аңа очраклы рәвештә генә ышанып тапшырылмаган. Район авыл хуҗалыгы һәм азык-төлек идарәсе вәкиле Морат Миндугулов билгеләп үткәнчә, ул уртак фикер алышу нәтиҗәсендә сайланып алынган.

– Конкурска кемгә барырга дигән карарны без үлчәп кабул иттек. «Ак Барс-Питрәч» җитәкчелеге белән киңәшләштек – аларның коллективы көчле, биредә лаеклы егетләр күп. Һәм бертавыштан уртак фикергә килдек. Рузил бик теләп конкурска барырга ризалашты, – дип сөйләде Морат Миндугулов.

Комбайнчының үзе өчен бу ярыш аның һөнәри юлында тагын бер этап була. Үз эшендә ул – тәҗрибәле кеше.

– Комбайнчы һөнәре һәрвакыт мактаулы, һәм мин балачактан ук җиргә тартылдым. Минем өчен бу инде «Нью-Холланд» штурвалы артында унберенче урып-җыю эшләре. Ә безнең кырда үзенчәлекле атмосфера. Без бер команда, бригадада һәрвакыт бер-беребезгә киңәш белән дә, эш белән дә ярдәм итәбез, – дип билгеләп үтте яшь комбайнчы.