Питрәчлеләр Чирмешәндә Медиа-Сабан туена кушылды

"Питрәч-информ" редакциясе хезмәткәрләре Чирмешән районына республика Сабан туена җыелды.** Анда да шул ук халык күңел ачулары, милли уеннар һәм традицион турнирлар. Аерма шунда гына: барлык катнашучылар да "Татмедиа" медиахолдингыннан.

Тантана коллективлар парады белән ачылды, анда без, питрәчлеләр үз районыбызның флагын күтәреп үттек. Һәр команда ярышучыларга бүләкләр алып килгән иде. Без "Питрәч" һәм "Татмедиа" дигән язулар чигелгән сөлге әзерләп алып бардык. Баш редактор Ольга Шәмсетдинова билгеләп үткәнчә, бу гореф-гадәт һәм йолалар чагылышы, элек-электән яшь киленнәр хөрмәт һәм яхшы мөнәсәбәтләр символы буларак, бирнәгә сөлге чигеп алып килә, шулай ук Сабантуйга сөлге бүләк итә торган булган.

Төп ярышлар башланганчы кунакларны суган пирогы белән сыйладылар. Мин аны беренче тапкыр татып карадым һәм суганның баллылыгына гаҗәпләндем. Пирог бик зур иде – диаметры 1,5 метр, бу бөтен чараның масштабын күрсәтә иде. Шулай ук безне казандагы пылау көтә иде – 150 килограмм пылау әзерләделәр.

Милли мәйданчыкларда тулы бер этнографик панорама җәелдерелгән. Чирмешән районында, бездәге кебек үк, төрле милләт вәкилләре яши. Мәсәлән, теләүчеләргә төрле җепләрдән саклагыч мордва курчаклары ясау процессын күрсәттеләр, чувашларда кунак булган чакта кәгазьдәге орнаментны гуашь белән буярга мөмкин иде.

Безнең команда иң зур командаларның берсе булып чыкты – без кызыклы уеннардан алып җитди көч сынауларына кадәр барлык ярышларда катнаштык.

Телеоператор Рәсил Гыйләҗев гер күтәрүдә бронза медаль яулады. Ул герне 45 тапкыр күтәреп, көмеш призердан нибары өчкә генә калышты. Узган ел Рәсил икенче урында иде.

– Сабантуйның зур плюсы – башка филиаллардагы хезмәттәшләребез белән аралашу, алар белән без бары тик шундый чараларда гына күрешәбез, – ди ул. – Бәйрәм мәйданчыгы компактлы иде, шуңа да карамастан, мин бер көндә 11 километр юл үттем.

Безнең ир-атлар аркан тартуда көмеш медаль алдылар. Медиа-Сабантуй инде дүртенче тапкыр оештырылды. Хәбәрчебез Валерий Мирошников безнең белән озак эшләми әле, шуңа күрә беренче тапкыр катнашты.

– "Татмедиа"да гомумән иҗади һәм иҗтимагый тормыш кайный. Сабантуй – аның аерылгысыз өлеше, – дип саный Валерий Владимирович. – Бу ял да, команда эчендә аралашу, башка редакцияләр белән танышу, спорт формасын саклау мөмкинлеге дә.

Иң кызу ярышлар дип ул аркан тартышуны һәм сумоны атады.

– Аркан тарту турнирында без җыела, йөз процентка көч куя һәм лаеклы нәтиҗәгә ирешә алуыбызны күрсәттек, тамашачылар да, үзебез дә моңа шатландык кына. Ә сумо – ул көрәш, авыр костюм киеп көч сынашырга кирәк иде. Зирәклек миңа өч көрәшнең икесендә җиңәргә һәм шулай ук икенче урын алырга ярдәм итте.

Миннур Шәмсетдинов көрәштә җиңүче булды.

Бу көнне турнирларда җиңүчеләрне генә түгел, иң яхшы хезмәткәрләрне дә хөрмәтләделәр. Социаль челтәрләрдә эшләү буенча редактор Зөһрә Галимуллина цифрлы трансформация лидерлары унлыгына керде һәм 30 мең сумлык сертификат алды.

Компьютер версткасы операторы Светлана Балабановага күпьеллык нәтиҗәле хезмәте өчен "Татмедиа" Республика матбугат һәм массакүләм коммуникацияләр агентлыгы грамотасы тапшырылды. Ул редакциягә 1997 ел ахырында килә, ә Казан полиграфия училищесы студенты чагында ук 1986 елда эшли башлый. Нәшрият эшендә барлыгы 40 ел.

– Башта газета бастым, аннары компьютерда текст җыючы, сайт мөхәррире булдым, социаль челтәрләрдә эшләдем, аннары версткага күчтем – һәм бүгенге көнгә кадәр монда, – дип санап китте Светлана Михайловна. – Хәзер яңа технологияләр, ясалма интеллект бик булыша. Бүген мин шулай ук даими рәвештә социаль челтәрләр өчен карточкалар ясыйм.

Медиа-Сабантуйны искә алып, Светлана Балабанова: "Элек мондый очрашулар үткәрелмәде, бары тик укуга гына бара идек", диде. Ә күңел ачу форматы күптән түгел барлыкка килде, һәм ул бик кирәк, чөнки хәзер укыту ешрак читтән торып, видеоэлемтә аша уза. Сабантуйда ул Тәтештән коллегасы Алсуны очраткан – алар 12 ел күрешмәгәннәр.

"Татмедиа" АҖ җитәкчесе Шамил Садыйков та Сабантуйның, беренче чиратта, дуслыкны һәм бердәмлекне ныгытуга юнәлдерелүе турында сөйләде. Ул ассызыклаганча, шулкадәр талантлы, әһәмиятле кешеләр бер зур медиаструктурада хезмәт итә.

– Республикабызның бүгенге тормышын журналистларыбыздан башка күз алдына китерү мөмкин түгел, – дип ышана Шамил Мөхәммәтович. – Һәр шәһәрдә, һәр торак пунктта, һәр районда безнең редакцияләр эшли. "Татмедиа" журналистлары республика үсешенә зур өлеш кертә.