Питрәчлеләр фикере буенча иң яхшы комбайнчы билгеләнде

Газета укучылар һәм социаль челтәрләрдә язылучылар «Халык комбайнчысы - 2025» дигән мактаулы исемгә ия булучыны билгеләделәр. Ул «Ак Барс-Питрәч» ҖЧҖнән Илфат Әхмәтов, аңа 2074 кеше тавыш бирде. Тавыш бирүдә барлыгы 5753 кеше катнашты, бу район халкының аграрийлар хезмәтенә кызыксыну зур булуын күрсәтә.

Илфат Әхмәтов – районның иң тәҗрибәле механизаторларының берсе, урып-җыю эшләрендә 25 ел эшли. Иген басуына мәхәббәт һәм һөнәргә тугрылык – Әхмәтовларның гаилә традициясе: ул үзе кырда 10 яшеннән эшли башлый, абыйсы Рәис Әхмәтҗановка ярдәм итә, ә бүген аның ярдәмчеләре арасында үз улы Илфар да бар.

– Миңа җирдә эшләү ошый. Безнең бригада дус, бер-беребезгә ярдәм итәбез, – дип уртаклашты җиңүче.

Илфат Әхмәтовның профессиональлеген якташларының симпатиясе генә түгел, күрсәткечләре дә раслый. Быел ул районның иң яхшы комбайнчыларының берсе буларак билгеләп үтелде инде. Икенче урынны алган хезмәттәше Рузил Гайнуллин да урак алдынгылары рәтендә.

Үткәрелгән тавыш бирү – ул конкурс кына түгел, ә игенчеләрнең авыр һәм игелекле хезмәтенә хөрмәт күрсәтү. Тавыш бирүдә катнашкан барлык комбайнчылар да – чын җиңүчеләр. Без аларга фидакарь хезмәтләре өчен рәхмәт белдерәбез, осталыкларын югары бәялибез һәм туган җиргә тугрылыклары өчен хөрмәт итәбез. Сезнең эш – безнең иминлек нигезе.