Питрәчлеләр китап укырга яратамы?

Хәзерге заманда интернет өстенлек итә, китап укучылар саны кимегәннән кими бара, диләр. Без питрәчлеләрдән бу турыда ни уйлауларын белергә булдык. Респондентларның күбесе моны гаджетлар йогынтысы һәм тормышның тиз ритмы белән аңлатып, азрак укый башлауларын таныдылар. Ләкин яраткан әсәрләре өчен минутлар табучылар да табылды.

– Хәзер аз укыйм, вакытым юк, эшем күп, – ди Надежда Кушникова. – Җәен буш вакытыбызны табигатьтә үткәрергә, урманга йөрергә тырышабыз. Ә кышын әйе, детективлар, мәхәббәт лирикасын укыйм.

Аңа барыннан да бигрәк табиблар турындагы тарихлар ошый, улы да, килене дә – медиклар. Габдрахман Әпсәләмовның “Ак чәчәкләр” әсәрен берничә тапкыр укып чыккан. Надежда Георгиевна элек кешеләрнең йоклар алдыннан һәрвакыт китап укуларын искә төшерә. Хәзер бу гадәт оныгы Агатага да күчкән.

– Без аның белән көненә берәр әкият укыйбыз. Кичә “Кот в сапогах” булды, бүген “Гадкий утенок” планлаштырылган. Агата миңа: “Әби укып бетермичә йокларга ятмыйбыз”, – ди.

Илдар Фәйзуллин даирәсендә китап сөючеләр күп. Ул китаплар арзанрак бәядән булса, яшьләр дә аларга акча кызганмаслар иде, дигән фикере белән уртаклашты.

– Хәзер алар кыйммәт, шуңа күрә электрон вариантка күчү яхшырак. Ярый, әдәбият интернетта бар, – дип билгеләп үтте ул.

Айгөл Маннанова да китап кибетендә “шопинг”ның шактый кыйммәт булуын билгеләп үтте. Аның фикеренчә, проблема тагын шунда, бүген һәркем эш-мәшәкатьләрдән арына алмый, көн бик тиз узып китә. Шуңа да карамастан, теләк һәм кызыксыну булса, вакыт табып була дип уйлый.

– Күптән түгел балалар-ата-аналар мөнәсәбәтләре турында дүрт китаптан торган серияне укып чыктым. Күбрәк романнарга өстенлек бирәм, психологияне, кайвакыт “Дивергент” кебек фантастиканы алам, – дип сөйләде ул үзе күбрәк өстенлек бирә торган әсәрләре турында. Айгөл йоклар алдыннан балаларына китап укып, аларда кечкенәдән китап укуга кызыксыну уята. Китапханәдән чыгу юлында без апалы-сеңелле Ирина Васильева һәм Валерия Чешкованы очраттык, алар балалар әдәбияты – “Простоквашино” һәм “Все вредные советы” китапларын алган иде. Кызлар китап уку мавыктыргыч кына түгел, сөйләм үсеше өчен дә файдалы, диләр.

Безнең сораштыру күрсәткәнчә, матур әдәбият – узган гасыр түгел. Укый башлау яки бу гадәтне кире кайтару өчен кайвакыт телефонны читкә кую да җитә. Киләчәктә китап укучыларны саклап калу өчен китап бәяләрен кабаттан карап чыгу кирәк.