Питрәчтә республиканың ирекле янгын сагы командалары арасында смотр-конкурс узды

Фото: © Валерий Мирошников / «Питрәч-информ»

Питрәчтә “Иң яхшы ирекле янгын сагы бүлекчәсе” республика смотрконкурсының 15 нче финалы узды. Төп бүләк – АРС-14 янгын сүндерү автомобиле, аның өчен көрәшкә район этапларында җиңгән 43 команда чыкты.

Ярышларда катнашучыларны Питрәч районы башлыгы Рәис Сөләйманов сәламләде. Ул авыл территорияләрен саклауда иреклеләрнең төп ролен ассызыклады:

– Ирекле янгын сүндерүчеләрнең кирәклеге һәм әһәмияте елданел ачыграк күренә бара, бигрәк тә ерак торак пунктларда урман янгыннары һәм янгыннар килеп чыгу куркынычын исәпкә алганда. Сез, гомерегезне куркыныч астына куеп, беренче булып ярдәмгә киләсез.

– Быел гына да Татарстан иреклеләре 300 янгынны сүндерүдә катнашты бу гомуми санның 20 проценты, – дип өстәде Россия Гадәттән тыш хәлләр министрлыгының ТР буенча Баш идарәсе башлыгы, эчке хезмәт полковнигы Ирек Кадамов:

Ирекле янгын сагы статистикасы: республикада 3345 кешедән торган 660 команда эшли, аларда 698 берәмлек техника бар. Һәр көнне 700 ирекле кизү тора, үз көчләре белән генә дә профессионалларны җәлеп итмичә узган ел җитмештән артык янгын сүндерелгән һәм 400 миллион сумлык милек коткарып калынган.

Ярышлар киеренке каршылыклар полосасыннан башланды: катнашучылар койманы, янгын сүндерү ыгы-зыгысын үттеләр, “зыян күрүчегә” беренче ярдәм күрсәттеләр (муен корсеты һәм аягына шина салдылар), сугышчан киемнәр киделәр. Шуннан соң катнашучылар янгын сүндерү мотопомпасын кабыздылар, янгын сүндергеч җиңсәләрен сулыкка салдылар һәм су агымы белән махсус мишеньнәрне бәреп төшерделәр. Һәр этап өчен командага баллар куелды, шулай ук вакыт исәпкә алынды.

– Без иң көчлеләрне ачыклыйбыз, әмма иң мөһиме – тәҗрибә уртаклашу һәм хезмәттәшлекне ныгыту, – дип билгеләп үтте 126 нчы янгын часте башлыгы, эчке хезмәт майоры Илшат Мәхмүтов.

Каты көрәштә Яшел Үзән районы командасы Татарстан ирекле янгын сагы бүлегенә смотр-конкурста өченче урынны яулады, аның призы мотопомпа булды. Икенче урынны һәм мобиль янгын сүндерү постын Тукай районы командасы алды.

Беренче урынны һәм төп приз АРС-14 янгын сүндерү автомобилен Питрәч районының Богородск авыл җирлегенең ирекле янгын сүндерү командасы яулады.

Фото: © Валерий Мирошников / «Питрәч-информ»

Бу гаилә командасы – ирле-хатынлы Александр һәм Алсу Кочетовлар. Александр – ИФО-2022 янгын сүндерүчеләре арасында шундый ук конкурста җиңүче, Россиядә призлы өчлеккә кергән. Аңа яшь чагында авыр атлетика, аннары кул көрәше белән шөгыльләнүе, спорт мастерына кандидат булуы ярдәм итә. Һәм 10 елга якын Гадәттән тыш хәлләр министрлыгы структурасына кермәгән профессиональ авария-коткару формированиеләрендә эшли. Алсу элек хәрби частьтә хезмәт иткән, шуңа күрә ир-атлар белән беррәттән янгынга чыга һәм ярдәм күрсәтә, ИФО конкурсында 3 нче урынны алган.

Күнекмәләр һәм тизлекнең аларга янгын сүндерүнең реаль шартларында кирәге чыга.

– “Авиатор” бакчачылык ширкәтендә бер кызны янган йорттан алып чыктык, – дип искә ала Александр. – Түбә ишелергә бер минут кына калган иде.

Кочетовларның өч улы һәм бер кызы үсә.

– Барысы да янгын сүндерүчеләр булырга тели, – диде елмаеп Алсу. – Кызым хәтта янгын сагын җитәкләргә хыяллана!

Татарстан Республикасы гражданнар оборонасы һәм гадәттән тыш хәлләр министры вазыйфаларын вакытлыча башкаручы Андрей Орлов билгеләп үткәнчә, Татарстан – өстәмә һөнәри белем бирүне системалы үстерүче, шул исәптән мондый конкурслар оештыручы беренче төбәкләрнең берсе:

– Сезнең профессиональлегегез гомерләрне саклап кала. Быел сез мөстәкыйль рәвештә 17 янгынны сүндердегез инде.

Смотр раслаганча, Татарстан иреклеләре ут стихиясенә каршы көрәштә ышанычлы терәк булып кала, ә аларның өлеше сакланып калган матди кыйммәтләр белән генә түгел, ә коткарылган гомерләр белән дә үлчәнә.