Питрәчтә талантлы балаларны билгеләп үттеләр

Фото: © Ольга Шәмсетдинова / «Питрәч-информ»

Иң яхшы укучылар, волонтерлар, иҗатта, спортта һәм районның иҗтимагый тормышында уңышларга ирешүчеләр призлар һәм бүләкләр алдылар. Һәр авыл җирлегендә балалар өчен чаралар узды.

Питрәчтә иң яхшыларга бүләкләрне район башлыгы Рәис Сөләйманов тапшырды. Ул балаларны сәламләде, алар белән аралашты, шулай итеп аларга игътибарын күрсәтте. Шулай ук активистлар башкарма комитет, мәгариф, мәдәният, яшьләр һәм спорт бүлекләре җитәкчеләреннән Мактау грамоталары алдылар. Гомумән алганда, йөздән артык бала билгеләп үтелде.

Шәле мәктәбе укучысы Диләрә Хәйруллина бик яхшы укый, төрле республика конкурсларында катнаша, алгебра һәм информатиканы ярата.

– Табиб булырга теләгән идем, әлегә кире уйладым, – диде ул. Алда әле аның карар кабул итү өчен вакыты җитәрлек, ул җиденче сыйныфны гына тәмамлаган.

Ә менә Питрәч икенче мәктәбеннән ун яшьлек Кәрим Сабиров инде төгәл белә – хореограф булачак. Ул инде җиде ел “Пластилин” хореография студиясендә бию белән шөгыльләнә.

– Миңа репетицияләр дә ошый, әмма барыннан да бигрәк мин сәхнәдә чыгыш ясарга яратам. Барлык чыгышлар да җаваплы. Республика конкурсларына да, башка барлык чыгышларга да без бер үк дәрәҗәдә җитди әзерләнәбез, – диде ул.

Алинә Саркеева Ленино-Кокушкино мәктәбендә укый һәм “Альянс” футбол командасында шөгыльләнә. Малайлар командасында бердәнбер кыз үзен бик уңай хис итә.

– Миңа малайлар белән футбол уйнау һәрвакыт ошый иде, аннары ярышларга ала башладылар. Кагыйдәләр буенча бу рөхсәт ителә, мин малайлар белән тигез уйныйм, шуңа күрә бу беркемне дә гаҗәпләндерми, – дип сөйли ул.

Балаларның максатчанлыгы сокландыра. Яшь хоккейчы Әскәр Шакиров та бик тырышып шөгыльләнә. 2013 елгы хоккейчы малайлар Идел буе федераль хоккей лигасында иң көчлеләр төркемендә уйныйлар. Аларның командасы да бүләкләр алды. Әскәр Шакиров – команда капкачысы. Әтисе Раннур Шакиров аның шөгыле турында сөйләде.

– Хоккейга без очраклы рәвештә, игълан буенча эләктек дип әйтергә була. Аңа ошады. Беренче вакытта, тренировкаларга иртәнге биштә яки ял көннәрендә барганда, ул түгел, без арый идек. Ул һәрвакыт барабыз гына ди, – диде ул.

Әмилә Әүхәдиева да үзенең хоббисыннан беркайчан да арымый, ул 4 яшеннән Иске Шигали авылындагы “Юлданс” бию коллективында шөгыльләнә, аның артыннан энесе Азамат та биюгә килгән. Аларны әниләре Диана һәрчак хуплый.

Һәр баланың уңышы артында педагогларның зур хезмәте тора, алар яңа үрләргә илтә, баланы яңа уңышларга илһамландыра. Балаларның уңышлары атааналар өчен дә зур сөенеч.

– Әти-әниләр өчен бу бик күңелле хәл. Бүләкләр һәм призлар болай гына яуланмый. Бу, еш кына синең бердәнбер ял көнеңдә, тренировкаларга яки репетицияләргә ярышларга һәм чыгышларга бару, төннәр буе дәрес әзерләү дигән сүз, – диде Диана Хәкимова.