Питрәчтән игезәк балаларны алда ни көткән?

– Евгения Николаевна, хәзер сезнең балаларга ничә яшь?

– Ксения һәм Ильяга мартта 17 яшь тулачак. Алар тугызынчы сыйныфтан соң мәктәптән киттеләр. Кызым икътисад һәм хокук институты каршындагы Казан инновация көллиятендә юрист булырга укый, улым – Ленино-Кокушкино авылындагы Казан авиация-техник көллияте филиалында белем ала, ул әтисе кебек эретеп ябыштыручы булачак.

– Элек алар һәрвакыт бергә булган, ә хәзер икесе ике җирдә димәк?

– Әйе, кызым Казанда. Ләкин алар очрашкач, үз бүлмәләрендә дүртәр сәгать серләшеп, сөйләшеп утыралар. Ир бала белән кыз баланың кызыксынулары төрле булыр тиеш кебек, әмма алар бер-берсеннән башка озак тора алмыйлар.

– Алар инде сезнең балигъ булган яшьтә, мөстәкыйль. Балачак елларын искә төшерсәк, аларны үстерү авыр булдымы?

– Дөресен әйтергә кирәк, бик авыр. Әниләр, әбиләр, сеңелләр ярдәм итте. Алар икәү бит, ике төрле кеше, шуңа күрә һәркемнең үз бишеге, үз горшогы, уенчыклары бер үк төсле булса да икесенеке дә бар иде.
Ана карынында алар күпме булса да, организм хатын-кызны психик яктан да, физик яктан да әзерли. Игезәкләр үскән чакта аларны күзәтү бик кызык иде. Әле сөйләшә дә алмаган чакта да, берберсен яхшы аңлыйлар иде. Балалар – ул бәхет, ә мин икеләтә бәхетле идем. Безнең өченче балабыз соңрак туды, Павлик, аңа хәзер ун яшь. Балалар миңа аны карарга ярдәм иттеләр.

– Сезнең игезәк балаларыгыз малай һәм кыз, алар тышкы кыяфәтләре белән бер-берсенә бик охшамаган. Ә характерлары буенча?

– Характерлары төрле. Ксюша бик таләпчән, остарак, ә Илюша йомшаграк. Аларның әбисе Елена Ивановна Лукина баянда уйный, мин дә музыка мәктәбен тәмамладым, дөрес, аннары шәфкать туташы булып эшли башладым. Менә безнең Илюша да гитарада уйный. Элек хоккейчы иде. Соңыннан аккордларны күрсәтүемне сорады, минем гитарамда уйный башлады. Хәзер ул бик яхшы уйный. Аның музыкаль белеме юк, анда көй-моңны ишетү сәләте көчле. Ксюша музыка мәктәбенә, аннары биюгә йөрде. Вокал белән уңышлы шөгыльләнде, күп медальләр, грамоталар, статуэткалар яулады. Музыка мәктәбен кызыл диплом белән тәмамлады. Буш вакытта чигү белән мавыга.