Питрәч бакчачыларына: помидорны ничек күчерергә?

Помидор үсентесен даими урынына утыртканда, чокырына чирек чиләк черемә, бер уч көл һәм ярты чәй кашыгы суперфосфат салырга була. Азотлы һәм калийлы ашламаларны үсенте тернәкләнгәннән соң эремә ясап кына сибәргә ярый, алар тамырны яндырырга мөмкин. Чокырына ваклап кычыткан салсагыз, тагын да яхшырак.
Күчерергә 2-3 көн кала помидор үсентесенең аскы 2-3 яфрагын өзәргә кирәк.
Үсентене күчергәннән соң, бер атна су сипмәгез, ул тамырын ныгытачак.
Помидор үсентесенең ян сабакчасын 5 см үскәнче өзәргә кирәк.
Чәчәк атканда бор кислотасы белән тукландырсаң, уңышы мул була. 10 л суга 5 г исәбеннән кушарга кирәк.