Питрәч районы терлекчеләре алга куелган бурычны уңышлы үтиләр

Районда 1 февральгә 3743 савым сыеры исәпләнә. Тулаем савым 67,2 тонна тәшкил итә, бу узган елның шул ук чоры белән чагыштырганда 4,9 тоннага күбрәк.

Әгәр театр вешалкадан башланса, терлекчелек - бозаулату бүлегеннән. 

Заманча сөт терлекчелегендә бозаулату цехлары булу мәҗбүри шарт булып тора, - дип сөйли Питрәч районының җитештерү-маркетинг бүлеге башлыгы Хәлим Гатиятуллин, - чөнки бозаулату  цехыннан башка тормышка сәләтле, сәламәт яшь терлек алу мөмкин түгел. Бозаулату вакытын контрольдә тотарга, бозаулар һәм сыерларга беренчел ярдәм күрсәтергә кирәк. Шуңа күрә безнең районда барлык зур хуҗалыкларның бозаулату цехлары бар, анда үз эшләрен яхшы белүче белгечләр хезмәт куя.

Гомумән, районда шундый 7 цех бар. Һәрберсе өч бүлектән тора: бозаулаганчы, бозаулату һәм бозаулаганнан соң. Барлык цехлар һәм бүлекчәләр кирәкле инвентарь һәм җиһазлар белән җиһазландырылган. 
«Ак барс Питрәч» ҖЧҖнең Белкинодагы алтынчы бүлекчәсендә урнашкан шундый биналарның берсенә Хәлим Сәлимович белән бергә бардык.

Бу бүлек бездә алдынгы хуҗалыкларның берсе һәм биредә үз эшләренең чын осталары эшли, алар үз эшләрен беләләр һәм аңа җаваплы карыйлар. Бозаулату цехының машина белән сыер саву операторы Мария Кожевникованы  иң яхшысы дип атар идем.

Мин күрше Чертово авылында тудым, - ди Мария Александровна. - Әнием Нина Ивановна гомер буе сыер савучы булып эшләде, мин дә аның юлыннан киттем. Бала чакта ук аның янына эшкә йөрдем һәм шул вакыттан ук бу эшне ярата башладым. Ә әни һәрвакыт минем белән һөнәр серләре белән уртаклашты. Мин аннан күп нәрсәгә өйрәндем, һәм миңа аларның кирәге чыкты. Мин аңа  моның өчен бик рәхмәтле. Бозаулату цехында мин биш ел эшлим, кулдашым Анна Батурина белән 25 сыер карыйбыз. Көн буе эшлибез, чөнки бозаулар һәм сыерларны озакка караусыз калдырырга ярамый. Яшь бозаулар зур игътибар таләп итә. Аларны  беренче көннән яшь бала караган кебек тәрбиялибез. Тәүлеклек бозауларны махсус имезлек ярдәмендә ашатырга туры килә. Сыерларны да саварга кирәк. Шуңа да эшсез утырырга туры килми.
Ә гомумән алганда, эш өчен шартлар идеаль дип әйтә алам. Ял бүлмәсе бар, кирәк булган бөтен нәрсә белән тәэмин итәләр. Шуңа да яхшы кәеф белән эшлибез. Үз хезмәтебезнең нәтиҗәсеннән ләззәт алабыз. 

Бүлекчә бригадиры Ольга Никитина да үз хезмәткәрләре турында яхшы яктан гына сөйли. 

Алар үз эшләрен бик яхшы беләләр, шуңа күрә бу цех өчен мин тыныч һәм тулысынча аларга ышанам, - ди Ольга Андреевна.  

Бүгенге көндә  район буенча  һәр сыердан 18әр килограмм сөт савалар. Узган елгы белән чагыштырганда 1,2 килограммга күбрәк. «Ак барс-Питрәч» (тулаем савым – 34,5 тонна һәм тәүлеклек уртача  савым - 22 килограмм), «Шәле-Агро» (12,8 һәм 21,4), «Агролак-К» (7,4 һәм 16,5), «Макс Ойл» (2,8 һәм 18)  сөт җитештерү буенча алда баручы хуҗалыклар.