Питрәч районы умартачылары сезонны ача

Иң күп бал кортлары Шәле (1305), Ленино-Кокушкино (374) һәм Питрәч (355) авылларында исәпләнә.

Кыш салкын булуга карамастан, бал кортлары кышлатуны бик аз югалтулар белән  генә уңышлы узды. Умарталарның торышы яхшы. Барысы да умартачыларның тәҗрибәсе һәм осталыгы аркасында, - ди умартачылык буенча инспектор Павел Егоров.

Иң тәҗрибәле умартачыларның берсе Пимәр авылыннан Мансур Фәйзуллин бу эшкә 1996 елда ук алына.

Мин белемем буенча агроном. Институтта безгә умартачылыкны да укыттылар. Башта бу минем өчен хобби иде. Ике умарта, аннары тагын ун умарта сатып алдым. Акрынлап яраткан мавыгуым бизнеска әверелде. Хәзер 280 умартам бар. Эш һәрвакыт күп. Хатыным Ләйсән, кызым Энҗе һәм улым Таһир булыша, - ди ул.

Әлегә умартачы бал кортларын бал белән тукландыру белән мәшгуль. Кар эреп бетүгә, умарталарның бер өлешен урманга, бер өлешен - болынга алып китә, анда бал җыю өчен төрле чәчәкләр күп. Мансур Фәйзуллин республика һәм күрше төбәкләрдән  коллегалары белән тыгыз элемтәдә тора, алар белән тәҗрибә уртаклаша. Төп эшеннән тыш, ул селекция белән шөгыльләнә, иң яхшы умарта күчләрен сайлап ала.

Узган ел безнең өчен уңышлы булды, һәр умартадан 70-80 килограмм югары сыйфатлы бал алдык. 2000 елда шундый ук бай уңыш алдык, - дип искә ала умартачы.

Бал кортларын шәхси ярдәмче хуҗалыкларда, КФХларда һәм авыл хуҗалыгы предприятиеләрендә генә тотмыйлар. Шулай ук  Аркатау чиркәвенең дә  үз умарталыгы бар, анда 40 умарта күче яши, аларны пономарь Михаил Князев карый. Аны бу эшкә Югары Ия авылыннан Роман Сергеев өйрәткән.

Алынган балның бер өлешен сатабыз, икенчесен мохтаҗларга таратабыз. Бу көннәрдә умарта ояларын акрынлап  чыгарабыз, - дип билгеләп үтә Михаил Николаевич.

Шул ук вакытта Казан авиация-техник көллиятенең Ленино-Кокушкино авылында урнашкан филиалында да умартачылыкны үстерәләр. Биредә 11 умарта исәпләнә. Казанда узган бал фестивалендә аларның балын Питрәч районында иң тәмлесе дип таныдылар.

Бездә махсус курслар бар, алар тәмамлангач, студент дүртенче разряд һәм умартачы дипломы ала, - ди укытучы Рәфкать Сөләйманов.