Питрәч районында 2021 нче елның истә калырлык фактларын искә төшерик

? Иң зур торт һәм самавыр

«Скорлупино» Бөтенроссия фестивалендә бисквит, безе, кош сөте, сгущенка һәм чикләвектән тәмле торт әзерләделәр. Десерт 450 килограмм авырлыгында булды. Ә чәйне кунаклар 200 литрлы самавырдан эчтеләр, аны махсус бәйрәмгә әзерләделәр. Торт та, самавыр да күләме һәм авырлыгы буенча республикада рекордлы булды.

✅ Ун тонналы мамонт фигурасы
 

«Царево Вилладж» торак комплексына керү юлында 9,5 тонна авырлыктагы һәм 5 метр биеклеккә җитә торган мамонт рәвешендәге металлдан зур фигура урнаштырылды. Конструкцияне Тольятти шәһәреннән берничә зур йөк машинасы алып кайткан. Мастерлар аны 6 ай ясаганнар. Бу тулысынча кулдан эшләнгән эш. Ул химик материаллар кулланмыйча, экологик ысул белән әзерләнгән арт-объект. Аның нигезе булып бетон мәйданчыгы тора. Кар, яңгыр йогынтысында скульптура төсен алыштырачак, мамонтның табигый төсләренә якынлашачак.

☝ Мәүлә Колый - безнең якташыбыз

Кайбер мәгълүматлар буенча, дин эшлеклесе, язучы-суфый Мәүлә Колый Чыты авылында туа. Аның мирасын саклау өчен районда зур тикшеренү эшләре башкарыла башлады. Киләсе елда Бөтенроссия фәнни-гамәли конференциясе узачак. Мәүлә Колый истәлеген мәңгеләштерү өчен киләчәктә районда мемориаль такта урнаштыру, парк ачу һәм Чыты авылындагы мәчеткә язучы исемен бирү планлаштырыла.

? "Акыллы йорт" төзеделәр

«Царево Вилладж» торак комплексында Татарстанда беренче күп фатирлы "акыллы йорт" барлыкка килде. Ул җылыту һәм су белән тәэмин итү системаларының газ котельноеннан эшләмәве белән аерылып тора. Системаның нигезен җирдән җылылык ала, үзгәртә, берничә тапкырга арттыра һәм аны җылыту системасына бирә торган геотермаль җылылык насосы тәшкил итә. Шул рәвешле ул су җылыта.
Йортта өстәмә рәвештә ике төр панельләр урнаштырылган. Аларның берсе кояш энергиясен куллана. Аны шулай ук суны җылытуга һәм подъездларны яктыртуга юнәлдерәләр. Бу процесс көндез, кояш булганда бара. Панельләрнең икенче төре - кояш коллекторлары. Алар кояш җылысын алалар һәм суны җылыталар.

? Төсле йомырка салучы тавыклар

Питрәч авылында яшәүче Марина Демидовичның хуҗалыгында токымлы кош-корт бар. Алар арасында кытай, француз, төрек тавыклары һәм әтәчләре. Һәрберсенең төсләре һәм тән төзелешләре төрле. Әмма бик матурлар, ә иң гаҗәбе: алар җаваплы төсле йомырка салалар.

? Районда фильм төшерделәр

Төлкияз авылы янындагы кырларда кече халыкларның югалуы проблемасына багышланган «Микулай» фильмы төшерелде. Танылган артистлар белән беррәттән аларда кастинг узган питрәчлеләр дә катнашты. Фильмның сценарие язучы һәм драматург Мансур Гыйләҗевнең шул исемдәге пьесасына нигезләнгән.

? ? ? Питрәчтән өч игезәк "Давай поженимся" шоуында булды

«Давай поженимся» программасы чыгарылышларының берсендә берьюлы 3 кияү - Илнур, Илнур һәм Илнар Мөхәммәтҗановлар булды. Алар тумышлары белән Питрәчтән, хәзер Мәскәүдә яшиләр. Аларның һәркайсына 27 яшь һәм барысы да табиб һөнәрен сайлаган. Медицина трактатын бергә язулары белән горурланалар. Япониягә булырга хыялланалар.