Питрәч районында «Безнең ишегалды» буенча төзекләндерелгән территорияләрдәге җитешсезлекләрне бетерәчәкләр

Питрәч районында «Безнең ишегалды» республика программасы буенча төзекләндерелгән территорияләрдәге җитешсезлекләрне бетерәчәкләр. 

Чарада район башлыгы Илһам Кашапов, идарәче компанияләр вәкилләре, йортлар буенча җаваплылар катнашты. Алар Питрәч һәм Ленино-Кокушкино авылларындагы 2020 елда гамәлгә ашырылган ишегаллары буйлап йөреп чыктылар, алар бер елдан соң барлыкка килгән җитешсезлекләрне ачыкладылар, проблемалы участокларны карадылар, йортларда яшәүчеләр белән аралаштылар.

Кайбер урыннарда асфальтта чокырлар барлыкка килгән. Юл төзүчеләренә һәм идарәче компанияләр вәкилләренә аларны бетерү буенча чаралар күрергә туры киләчәк", - дип уртаклашты безнең белән Питрәч районы башкарма комитеты җитәкчесе урынбасары Рамил Шәйхетдинов.

Алга таба район башкарма комитетында 2021 елда төзекләндерелгән ишегалды территорияләрен карап чыгарга планлаштыралар.

"Тикшерү моның белән генә тәмамланмый. Алга таба Иске Шигали һәм Колай авыллары ишегаллары тикшереләчәк", - дип уртаклашты башкарма комитет җитәкчесе урынбасары.

Ишегалларын төзекләндерү дәвам итә, бүгенге көндә юл хезмәтләре грунт ташый, аннары йорт яны территорияләрендә газон җәеләчәк.

Исегезгә төшерәбез, 2021 елда Иске Шигали, Пановка һәм Колай авылларында 19 ишегалды ремонтланган. Питрәч һәм Ленино-Кокушкино авылларында 2020 елда шундый ук территорияләр төзекләндерелгән. Питрәч районында «Безнең ишегалды» биш еллык программасы буенча 95 ишегалды төзекләндереләчәк.