Питрәч районында урман янгынын сүндерү буенча өйрәнүләр узды

Эссе һәм коры һава торышы булу сәбәпле, Татарстанда янгын куркынычының 5 нче классы билгеләнгән. Шул уңайдан Питрәч районында өйрәнүләр узды.

Аларда янгын сүндерү һәм коткару гарнизоны хезмәткәрләре, урман янгын сагы, җирле үзидарә органнары, иреклеләр, газовиклар, экологлар һәм башка күзәтчелек органнары катнашты. 

Без табигать янгыннары килеп чыгу һәм аларның урманнар янында урнашкан торак пунктларга күчү куркынычларын бәяләдек. Нәтиҗәләр гадәттән тыш хәлгә яхшы әзерлек күрсәттеләр. Куелган бурычлар үтәлде. Гамәлләр җайга салынган һәм профессиональ, - дип билгеләп үтте Питрәч янгын сүндерү һәм коткару гарнизоны башлыгы Илшат Мәхмүтов.

Бу җәй эчендә безнең районда урман янгыннары булмады. Питрәч участок урманчылыгында урманнар 13680 гектар мәйданны били.