Питрәчнең “Шатлык” приютында тәрбияләнүчеләр янгын частенә экскурсия ясадылар

Питрәч муниципаль районының янгын частендә очрашу оештырдылар. Янгын сүндерү бүлегенең дежурлары балаларны каршы алдылар. Алар җитәкчелегендә, балалар территорияне карадылар, янгын сүндерү машинасын һәм янгын сүндерү кирәк-яраклары белән таныштылар. Тәрбияләнүчеләр күпме техник корал барлыгы белән таныштылар. Янгын чыккан очракта үзеңне ничек тотарга кирәк икәнлеге һәм янган бинадан ничек эвакуация ясарга кирәклеге турында сөйләделәр. Балалар зур кызыксыну белән техниканы карадылар, үзләрен кызыксындырган сорауларны бирделәр һәм, әлбәттә, янгын сүндерү машинасыннан су сиптереп карау мөмкинлегеннән дә файдаландылар. Балаларның бер-берсе белән сөйләшүләреннән һәм фикерләшүләреннән чыгып, аларның бик канәгать калулары аңлашылды.