Питрәчтән КФХ хуҗасы Алмаз Фәсхетдинов сыерлар да, кошлар да асрый

Бу ферманың тарихы 2011 елның язында башланды. Ул чакта безне район башлыгы Шәйхулла Галимулла улы үзенә чакырды һәм гаилә фермасы ачарга тәкъдим итте. Яңа ярдәм программасы турында  сөйләде. Без авыл хуҗалыгы министрлыгына бардык, тулырак мәгълүмат алдык, - дип искә ала Алмаз Фәсхетдинов. 

Ныклап уйлаганнан соң   ул программада катнашырга риза була һәм әтисе белән эшкә тотына.

Сыерлар өчен бина төзи башладык, - дип билгеләп үтә Алмаз Зиннур улы.

Программа буенча 1 миллион сум акча алганнар, район да шуның кадәр акча биргән. Әмма бу акча җитмәгән, өстәмә рәвештә кредит алганнар. Берара, фермер бурыч йөкләмәләрен үти алырбызмы, дип куркуга кала, әмма  соңыннан эшне башладың икән аны дәвам итәргә, алдыңа куйган максатыңа ирешер өчен алга барырга кирәк, дигән ныклы карарга килә.
Бина әзер булгач, 40 сыер сатып алганнар. Алынган сөтне Питрәчтә тапшырганнар, соңрак Арчага озата башлаганнар. Табыш ала башлыйлар, әкренләп кредитларны түләп бетерәләр.
Фермер тәҗрибә туплый,  аның үз көченә ышанычы арта һәм кошчылык өлкәсендә дә үсеш алуын дәвам итә. Ул күптәннән кошлар үстерергә хыялланган була. Акчалата грант ота һәм кош фермасы төзи. Хәзер бу бинада 10 мең бройлер чеби асрыйлар. Беренче көннәрдә аларга зур игътибар кирәк, ә иң мөһиме – уңай һава температурасы булу зарур. Бер атналык бройлерлар бинасын 33-34 градус җылылыкта тоталар. Газ пушкасы эшли, өстәмә рәвештә  бинаны утын ягып җылыталар. Чебиләрне анда якынча ай ярым тоталар. Кайчагында анда  кызыл тавыкларны урнаштыралар, аларның үсеш вакыты – 3 ай. Ә җәен  үрдәк, казлар утырталар. Аннары кошларны күпләп саталар, ял көннәрендә Казанның Агросәнәгать паркына баралар. 
КФХ хуҗасы  мөгезле эре терлекләрдән баш тартмый. Хуҗалыкта 40 сыер бар, алардан тәүлегенә 420-450 литр сөт савып алалар. Хуҗа билгеләп үткәнчә, бу аз, чөнки сезон түгел, бозаулау чоры бара. Җәен көтүлеккә чыкканнан  соң, ул күбрәк булачак. 
Бу гаилә фермасы. Алмаз әтисе белән эшли. Шулай ук аларның 5 ялланган эшчеләре бар. 

Бу ел алдагыларына караганда катлаулырак башланды, чөнки азык кыйммәтләнде: арпа, бодай, печән. Авыр, әмма эшләргә кирәк. Мондый хуҗалык алып бару өчен, тырышмыйча булмый, - диде әңгәмәдәшем.

Аның планнарында - кошлар өчен тагын бер ферма төзү.