Россия Герое Иван Додосов: “Районда минем иң яраткан урыным – үзем укыган мәктәп”

Бүген Питрәч районының 96 еллыгы билгеләп үтелә. Шул уңайдан без халыктан туган җирләрендә иң яраткан урыннары турында сораштык. Беренче булып сүзне безнең данлыклы якташыбыз, Россия Герое Иван Додосов алды. Ул мәктәпнең ни өчен аның йөрәгендә мәңгегә кадерле урын булып калуы турында сөйләде, беренче кыңгырауны искә төшерде һәм “Мактаулы гражданин” исемен алудан алган хискичерешләре белән уртаклашты.

– Район үсә, матурлана, масштаблырак була бара. Көн саен кешеләр аның камилләшүенә үз өлешен кертә. Шуңа күрә район башлыгын һәм барлык халыкны шушы искиткеч бәйрәм белән котлавыма шатмын!

Минем кече ватанымда иң яраткан урыным – Россия Федерациясе Герое Иван Додосов исемендәге Питрәч 1 нче мәктәбе. Мин монда үстем, укыдым, һәм бу мәктәп – минем генә түгел, бөтен районның горурлыгы. Бу бина укыту гына түгел, бөтен районны үстерү функционалын да үти. Биредә булачак геройлар, эшмәкәрләр, җитәкчеләр үсә. Һәм мәктәп барлык заманча стандартларга туры килә.

Әлбәттә, мин беркайчан да мәктәп минем исемне йөртер дип уйлаганым булмады. Махсус хәрби операция булыр, анда мин үземне кешеләр хәтерендә гасырлар буена калачак батырлык кылырмын дип тә уйламаган идем. Мәктәп тормышыннан иң якты истәлек – ул мәктәпкә барган көн, ә аннары чыгарылыш. 1996 елның 1 сентябрен хәзергечә хәтерлим. Минем беренче линейкада бөтен гаиләм катнашты – әни, әти, апам, ул да шушы мәктәптә укыды. Иң кечкенә булганга күрә, мин беренче бардым, һәм мине беренче укытучым Казнова Надежда Васильевна кулымнан тотып алып чыкты.

Шулай туры килә, мин ялга кайткан вакыт каникулларга эләгә, шуңа күрә мәктәптә еш булмыйм. Отпускны мин гаиләм белән үткәрәм. Бу бездә булган иң кыйммәтле әйбер, шуңа күрә күпчелек вакыт алар белән булырга тырышам.

Күптән түгел миңа “Питрәч районының Мактаулы гражданины” билгесен тапшырдылар. Минем өчен бу көтелмәгән вакыйга булды. Әлбәттә, шулай ук бу зур горурлык. Бу район башлыгының, аның командасының һәм гомумән җәмәгатьчелекнең ихтирамы һәм ышанычы билгесе.