Шәледә давыл нәтиҗәләре белән көрәшәләр

14 июньдә Шәле авылы аша көчле давыл уза, җилнең тизлеге секундына 20 метрдан артып китә. Бәла-каза нәтиҗәсендә сигез шәхси йортның түбәсе җимерелгән, агачлар ауган, электр линияләре өзелгән. Бәхеткә, корбаннар юк.

– Башта көчле давыл тавышы ишетелде, аннары түбә шыгырдаган тавыш ишетелде, – дип сөйли Дәниф Әхмәтшин.

Бу вакытта егет өйдә була. Урамга йөгереп чыккач, җил йорт түбәсенең бер өлешен йөз метрга алып ташлаганын күрә.

Аның әнисе, Минсәрия Әхмәтшина, зыянны 200 мең сум дип бәяли – профнастилга, бруска, төтен юлына, өй кыегына материал өчен шулкадәр акча киткән. Түбә астында сакланган печән юешләнгән, ләкин бу исәпкә керми. Туганнары һәм күршеләре ярдәме белән зыянны оператив рәвештә бетерәләр.

ТР Гадәттән тыш хәлләр министрлыгының оператив төркеме бер сәгать эчендә килеп җиткән.

– Алар шунда ук зыянны теркәделәр, барысын да фотога төшерделәр, кемгә дә булса ярдәм кирәкме икәнлеген ачыкладылар, – дип сөйләде Минсәрия.

Иминият агентлары шулай ук оператив рәвештә документлар рәсмиләштергән, әмма түләүләр әлегә алынмаган.

Питрәч районы Гражданнарны яклау идарәсе җитәкчесе Илнур Мингалиев сүзләренә караганда, иминият түләүләре башкарылачак, әмма моның өчен зыян күрүчеләргә өч көн эчендә ТР гидрометеохезмәтеннән давыл турында рәсми белешмә алырга кирәк.

– Әгәр милекләре иминиятләштерелгән булса – аларга зыянны компенсациялиләр. Иң мөһиме – документларны вакытында тапшырырга, – дип аңлата ул.

Алсу Салихова давыл вакытында Казанда була. Булган хәл турында аңа күршесе шалтыратып хәбәр итә. Ул кайтканда инде йортка су үткән була.

– Ярый, стеналарыбыз гипсокартоннан түгел, югыйсә бөтенесен чыгарып ташларга гына туры килер иде, – ди ул борчылып.

Аның йорты да давыл иң көчле булган «серле полоса»да урнашкан һәм зыян күргән. 2017 елда да монда җил түбәләрне шулай алып ташлаган була, әмма бу юлы давыл көчлерәк була.

– Эшче куллар җитми – хәзер барлык осталар да эш белән мәшгуль, без үз чиратыбызны көтәбез, – дип аңлата Алсу.

– Калайны җил очырган, кирпеч стенага зыян килгән, хәзер аңа күпме акча кирәк? Ә аның әле йөри алмый торган җитмеш яшьлек әтисе бар, – дип борчыла туганына ярдәм итүче Рафикъ Әхмәтов.

Йортлары җимерелүгә карамастан, шәлеләр паникага бирелми.

– Башта куркыныч иде, аннары туганнар, дуслар җыелды, һәм җиңел булып китте, – ди Дәниф Әхмәтшин.

Табигать бәла-казасы турында алдан белеп булмый, әмма авыл халкы бердәм – ярдәм итмичә калмаячак. Авылда һава торышына караганда, бер-берсенә күбрәк ышаналар. Шулай ук бәла-каза була калса дип, алдан ук барысын да кайгырталар. Шәле халкы үз тәҗрибәләренә таянып, ныграк төзелеш материалларын сайлыйлар. Иминиятләштерүләргә янгыннардан һәм табигать бәлаказаларыннан зыян гына түгел, хәтта күршеләргә китерелгән зыян да кертелгән – түбә дистәләгән метрга очып китәргә мөмкин бит.