Ә сезнең "Сула"да булганыгыз бармы әле?
Бер ай элек безнең районда көтеп алынган "Сула" бассейны ачылды. Яңа объектны бәяләргә өлгердегезме инде? Без сайт укучыларга нәкъ тә шундый сорау белән мөрәҗәгать иттек. Сораштыру нәтиҗәләре болайрак: бассейнга йөрүчеләр канәгать, һәм алар бирегә даими йөриячәкләр, ә анда булмаганнар медицина белешмәсе алыр өчен күп анализ бирергә кирәклегеннән һәм моның түләүле булуыннан зарлана.
Екатерина Андреянова, бухгалтер
Бассейнга без беренчеләрдән булып йөри башладык дияргә була. Минем кызларым София һәм Мариягә суда йөзү һәм уйнау бик ошый. Бу аларга зур куаныч һәм сәламәтлекләре өчен бәяләп бетергесез файда китерә. Шуңа күрә без бассейнга бик теләп йөрибез. Йөзү секцияләренә 7 яшьтән зуррак балаларны җыйганнарын беләм, шундый ук дәресләр мәктәпкәчә яшьтәге балалар өчен дә үткәрелсен иде. Питрәчтә үз балаларын йөзәргә алып йөрергә теләгән әти-әниләр бик күп дип уйлыйм.
Әлфия Гайнетдинова, кече тәрбияче
Бездә бассейн ачылганына мин бик шат, балалар өчен дә, олылар өчен дә ял итү урыннары артканнан-арта бара, бу бик яхшы. Мин анда бассейн ачылган беренче көннән бирле барырга телим. Әмма, кызганыч, мин көн саен эштә, ә бассейнга бару өчен бик күп медицина белешмәләре кирәк, шуңа күрә безнең әле анда булганыбыз юк. Әмма бик тиздән без бу кыенлыкларны җиңәрбез дип өметләнәм. Күп балалы гаиләләргә ташламалар булуын теләр идем.
Сиринә Габдулганиева, декрет ялында
Физкультура һәм спорт белән шөгыльләнү һәр бала өчен файдалы. Бу сәламәтлекне ныгытып кына калмый, балаларга сәләтләрен ачарга, яшьтәшләре белән аралашырга ярдәм итә. Моннан тыш, спорт күнекмәләре - ял вакытларын уздыруның яхшы ысулы. Улыбыз хоккей, ә кызыбыз бию белән шөгыльләнә. Хәзер аларның тагын бер шөгыльләре барлыкка килде - ул да булса, бассейнда йөзү. Алар бирегә бик теләп йөриләр, аларга бар да ошый.
Следите за самым важным и интересным в Telegram-каналеТатмедиа
