Синоптик Татарстанга эссе кайтачакмы-юкмы икәнен сөйләде

Быел Татарстанга җәйге эссе башка кайтмаячак. Бу хакта «Метео» һава торышы үзәге җитәкчесе Александр Шувалов сөйләде.

Аның сүзләренчә, августның калган көннәрендә һава температурасы соңгы еллардагы күрсәткечләргә караганда 1 – 1,5 градуска түбәнрәк булачак. Хәзер көндезге температура 21-24 градус чамасы тора. Әмма 11-18 августта сизелерлек суытачак. Ай ахырында көндезге күрсәткечләр 16-21 градуска, ә төнгеләре 8-15 градуска кадәр төшәчәк.

«Ә айлык явым-төшемнәр күләме нормага якын була, сизелерлек артып китү булмаячак. Августта эссе көтәсе түгел инде, ә инде сентябрьгә таба сезонлы салкыннар башлана», – диде Шувалов.

Метеоролог һава торышы алышынуны атмосфера процесслары үзгәрү белән аңлатты. Июльдә Идел буена рекордлы эссе алып килгән көчле антициклон кимеде һәм китте. Аның урынына Көнбатыштан күпкә тынычрак һава массалары килде.

Аның сүзләренчә, Татарстанда календарь җәе гадәттәгедән иртәрәк төгәлләнде дияргә була. Хәзерге вакытта уңайлы, әмма инде җәйге булмаган һава торышы әкренләп суыначак.