Татарстанда бер атнада борщ җыелмасы кыйммәтләнгән

Татарстанстат 17 – 24 март атнасында азык-төлеккә бәянең күпме артканын исәпләп чыгарган.

Чөгендернең бер килограммын уртача 49,9 сумга (+7 процент), бәрәңгене – 62,6 сумга (+3 процент), кишерне – 40,2 сумга (+1 процент), кәбестәне – 47,8 сумга (+3 процент) алып була. Борщ җыелмасыннан суганның бәясе 1 процентка төшкән, аның бер килограммын уртача 52,6 сумга сатып алырга мөмкин.

Татарстанстат исемлегендәге азык-төлекләрдән барыннан да бигрәк кыярның бәясе 200 сумнан 184 сумга төшкән (-8 процент). Помидорның бер килограммы уртача 253 сум тирәсе булып калган.