Укытучылар да кеше, ләкин һөнәрнең үз таләпләре бар
Сезнең социаль челтәрләрдә үз страничкагыз бармы? Минемчә, бу сорауга күпчелек “әйе” дип җавап бирәчәк. Төрле яшьтәге һәм төрле һөнәр ияләре көн саен аккаунтлар булдыра, алар үз тормышлары турында сөйли, яңалыклар белән таныша, үзләре өчен кирәкле һәм файдалы мәгълүмат ала. Аларның кайберләре аңлы рәвештә үзләренең шәхси мәгълүматларын бөтен халык күрерлек итеп урнаштыра, ә кайберәүләр сакчыл эш итә. Әлбәттә, һәркем моны үзе хәл итә. Мондый страничкалар тора-бара безнең “портрет”ка әйләнә һәм күп нәрсәләр сөйли ала.
Күптән түгел бөтендөнья интернет челтәрләрендә чираттагы гауга чыкты – Омск өлкәсеннән бер укытучының су коену киеменнән төшкән фотосы интернетта урнаштырылган иде. Җитәкчелек беренче эш итеп, кызны этика нормаларыннан чыгып, эшеннән азат итә. Әмма җитәкчелекнең бу гамәле бөтен илнең мәгариф өлкәсе хезмәткәрләре арасында зур резонанс тудырды. Алар социаль челтәрләрдә су коену киемнәреннән төшкән фотоларын, яки #учителятожелюди хештегы белән үзләренең ялдагы фотоларын урнаштыра башлады. Мондый хуплау Омскидан укытучыны кире эшкә алуларына йогынты ясады. Әмма педагоглар бүген дә фотографияләрен социаль челтәрләргә урнаштыруларын дәвам итә.
Без Питрәч мәктәпләре укытучыларыннан әлеге хәлгә карата мөнәсәбәтләрен, фикерләрен белергә һәм үз страничкаларына нәрсәләр урнаштыруларын сораштырырга уйладык.
Әлбәттә, укытучылар да кеше, алар да башкалар кебек үк үз хис-кичерешләре, тойгылары белән уртаклашырга тели, алар да үз вакытларын үзләре теләгәнчә үткәрә ала, – дип саный икенче мәктәптән укытучы Гөлназ Хөсәенова. – Әмма без балалар, ата-аналар өчен дә үрнәк булырга тиеш. Алар мондый нәрсәләрне үзләренчә бәяли, ә фикерләр һәркемнең төрле. Ягъни хәзерге вакытта интернеттан читтә калып булмый, әмма аңа уйлап карарга кирәк. Мин үзем мондый фотоны интернетка кертмәс идем.
– Бүгенге көндә интернеттан калышып булмый, – диде беренче мәктәп укытучысы Гөлнара Шәрипова. – Минем аккаунтым юк, әмма социаль челтәрләргә керәм, балаларның ничек яшәвен, аларның нәрсә белән кызыксынуын белеп торырга кирәк, хәзер бит алар күбесенчә интернетта утыра. Минем өчен бу мөһим түгел, әгәр страничка ачсам да бу укучылар хакына гына булачак, ә шәхси фотографияләр урнаштыру өчен түгел.
- Күп кенә кешеләрдә булган кебек үк, минем социаль челтәрдә дә шәхси фотографияләрем бар, - диде беренче мәктәптән укытучы Светлана Шәйдуллина. – Ялда төшерелгән фото да, эш моментлары да бар. Әмма мин аларны бик җентекләп сайлыйм, һәм коену киемендә төшкән фотоны социаль челтәргә куймас идем. Без заманча кешеләр булырга тырышабыз һәм тиешбез. Ләкин һөнәр билгеле бер чикләр куя, педагогны һәм башка һөнәр ияләрен бу мөнәсәбәттә чагыштыру кыен.
- Без социаль челтәрләрдә юк, Интернеттан электрон журналга гына керәбез, кайвакытта эш буенча кирәкле материаллар карыйбыз. Еш кына анда утырырга вакыт юк, - диләр беренче мәктәп укытучылары Валентина Макарова һәм Альбина Долгова. – Ниндидер фотолар турында әйтеп тә торасы түгел. Һичшиксез, моның нәтиҗәсе булмый калмый, дип уйлыйбыз.
- Юк, социаль челтәрләрдә утырмыйм, әмма һәрвакыт элемтәдә торыр өчен мессенджерлардан актив файдаланам, - ди педагог-психолог Анна Галимова. – Бигрәк тә социаль челтәрләрдә утырган укучылар артыннан күзәтергә тырышам. Минем ниндидер шәхси фотоларым булган аккаунтым бар иде, әмма анда коену киемендә төшкән фотолар юк.
Ахыр чиктә социаль челтәргә нәрсә куярга икәнлеген һәркем үзе белә. Ә сез бу турыда нәрсә уйлыйсыз? Үз фикерегезне pestrecy-rt.ru сайтында белдерегез.
Следите за самым важным и интересным в Telegram-каналеТатмедиа