Урман чикләвеге җыю буенча киңәшләр

✅ Урманга барганда ачык җирләрегез калмасын. Бу урман бетеннән саклану өчен дә, аяк-кулларны сыдырмау өчен дә кирәк.

✅ Озын балаклы бутый кию яхшы, елан килеп чыкмасын!

✅ Муенга асыла торган букча табыгыз. Ике кулыгыз буш булыр.

✅ Күзлек кисәгез, күзегезгә ботаклардан чүп коелмас. Чикләвек җыйганда гел өскә карап йөрелә.

✅ Букчагызга карга борыны (плоскогубцы) салыгыз. Чикләвекне җыйганда аның төшен ашап карыйсы килә.

✅ Сирәк үскән чикләвеккә алданмагыз. Күпле агачны табыгыз. Иң өстәге бердәнбер чикләвеккә күп вакыт сарыф итү мәгънәсез.

✅ Эре чикләвекле агач табарга тырышыгыз. Бер агачның чикләвекләре бер үк размерда була.

✅ Ботакларын күтәреп карагыз яки шулар астына кереп җыегыз. Чикләвек шунда яшеренә.

✅ Агачка кояш ягыннан килегез. Күзегез дә чагылмас, чикләвек тә качмас.

✅ Агач бик сыгылмалы. Озын ботакларны бер кеше аударып, икенче кеше җыю уңайлы.

✅ Зур ботакларны сыгу өчен озын саплы ыргак кулланырга була.

✅ Вакыт-вакыт чикләвектән арынып, якын-тирәгә карап алу киңәш ителә. Адаша күрмәгез.

✅ Өлгергән чикләвек коелырга тора. Ботакларны җайлап кына, калтыратмый гына аударыгыз.

✅ Нык өлгергәннәрен агачны селкетеп җыярга була. Агач төбенә җәймә куясыз да, чикләвек шунда коела.

✅ Чикләвекне өйгә алып кайткач, аның өстенә йөк бастырып куялар. Чикләвекне кишәнкесеннән куптару җиңелрәк булыр.

Чыганак