Волонтерлар мәктәп укучыларына Курск чик буена барулары турында сөйләде

Фото: © Валерий Мирошников / «Питрәч-информ»

Питрәч икенче мәктәбенең 8 һәм 9 “Г” сыйныф укучылары Ленинград блокадасын өзүгә багышланган күргәзмәне карадылар һәм “Медангелы России” хәрәкәте волонтерлары Ирина һәм Эдуард белән очраштылар. Алар сугышчыларыбызга гуманитар йөкнең ничек китерелүе, хәрби госпитальгә нинди ярдәм тапшырылуы һәм СВО вакытында яралыларның кайда дәвалануы турында сөйләделәр.

Эшмәкәр һәм менеджер Эдуард, ә хәзер волонтер, фронт сызыгында аны “Профессор” позывное белән беләләр. Алар Курск өлкәсенә гуманитар ярдәм белән беренче тапкыр барганнан соң, үзләренә волонтерлык оешмасы кирәклеген аңлый. Гуманитар ярдәм – ул фронтка реаль ярдәм, ләкин бу әле финанс белән дә бәйле, әгәр барысын да закон буенча эшләргә һәм конкрет сугышчыларга, медикларга, госпитальләргә йөкне китерергә теләсәң, барысын да үз контролеңдә тотарга кирәк. Шулай итеп “Медангелы России” барлыкка килә.

Укучыларга чираттагы сәфәр турында видеоматериаллар күрсәтелде. Алар туган җиребезне саклаучы, аларга ярдәм итүче, кирәкле әйберләр белән тәэмин итүче, госпитальгә озатыр алдыннан стабилизация пунктларында яралыларга беренче ярдәм күрсәтүче кешеләрне күрә алдылар.

Эдуард Казан кешесе, ә аның ярдәмчесе “Княжна” позывнойлы Ирина – Питрәчтән, беренче мәктәпне тәмамлаган, хәзер ПФУ мехматында математика укытучысы булырга укый. Ниндидер хәрби структурада хезмәт итү турындагы балачак хыялы волонтерлыкта үз урынын тапкан. Аның активлыгы нәтиҗәсендә узган юлы җибәрелгән гуманитар ярдәмнең 80%ы Питрәч районыннан килгән.

Укучылар ярдәм җыюда һәм солдатларга хат язуда катнаштылар, алар видеодан технология дәресләрендә бүләк итеп әзерләгән һәм кадрда күренгән үз уенчыкларын танырга тырыштылар. Ә диңгез пехотасының 810 нчы бригадасы сугышчылары видеода яңа елга ярдәм һәм бүләкләр җибәрүчеләргә рәхмәт белдерделәр:

– Балалар хатларыгызны рәхәтләнеп укырбыз, алгы сызыктагы иптәшләребезгә тапшырырбыз. Ярдәмегез өчен зур рәхмәт сезгә!

– Курск чик буе сугышчыларыннан “Көмеш волонтерлар”га, “Совет офицерлары берлеге”нә, “Прогресс” лицеена, район мәктәпләренә, “Форпост” оешмасына һәм район халкына рәхмәт белдерәсебез килә.

Мәктәп укучыларына гадәти Курск гаиләсе турындагы ролик та тәэсир итте. Анда гадәти тормыш алып баручыларның илне саклаучыларның тормышы өчен көрәшергә вакыт табулары турында күрсәтелде. Золотаревлар гаиләсе – Дмитрий, Татьяна һәм аларның кызы Елизавета белән танышу очраклы, әмма хәлиткеч була. Бу гаилә төбәкнең тотрыкландыру пунктларының берсендә волонтерлык итә, медикларга сугышчыларны госпитальгә озатыр алдыннан тәртипкә китерергә ярдәм итә. Хәзер “Медангелы России”дан гуманитар ярдәмнең бер өлеше әлеге тотрыкландыру пунктына тапшырыла.

– Мин биредә көн саен диярлек, – дип сөйли Дмитрий Золотарев. – Кызлар – чиратлашып килә. Чөнки эш тә, уку да, кечкенәбез дә бар әле. Аның белән шөгыльләнергә кирәк. Ай ярым вакыт эчендә ике-өч тапкыр гына өйдә кундым.

Мондый кешеләр үсеп килүче буын өчен үрнәк булып тора. Мондый очрашуларны оештырганда волонтерлар нәкъ менә шундый максатны күздә тота да инде.

– Яшь буынга җиткерергә, хәзер ниләр булганын аңлатырга. СВО – сүз генә түгел. Безнең нинди дөньяда яшәвебезне, ни өчен кешеләр һәлак булуын һәм ни өчен ярдәм итәргә кирәклеген аңлау өчен.

– Мин үзем бер ел Питрәч район үзәк хастаханәсендә эшләдем һәм грамоталы квалификацияле медицина ярдәменең кыйммәтен аңлыйм, – дип сөйли Ирина. – Ә хәрби медиклар белән очрашкач, боларның чыннан да тиңләшерлек кешеләр икәнен аңладым. Һәм алар турында яшьләребезгә сөйлисем килә.

Очрашуга туган якны өйрәнү музее директоры Ләйсән Шәйхетдинова йомгак ясады: “Безнең халык авыр вакытларда бердәм булган, бернинди кыенлыклар да безне сындыра алмый. Безнең бабаларыбыз фашистлар алдында баш имәгәннәр, бүген дә безнең солдатлар алгы сызыкта шундый ук зур эш башкаралар!”

Чараны “Җиңү безнең кулда булачак! Без бергә җиңәчәкбез!” дигән лозунг белән тәмамладылар.