Юллардагы хәл катгый чаралар таләп итә

Безнең районда юл хәрәкәте кагыйдәләрен бозу очраклары ешайды. Машина йөртүчеләр кеше гомере бәрабәренә торган иң гади кагыйдәләргә игътибар итмәүләрен дәвам итәләр. Быел Питрәч юлларында һәлак булучылар арасында күбесе - гаепсез җәяүлеләр.
Питрәчтә узган җыелышта районның ЮХИДИ башлыгы Мидхәт Әхәтов, район эчке эшләр бүлеге башлыгы урынбасары Азат Хәбибрахманов һәм Питрәч Росгвардия башлыгы Илдар Сафин юл-транспорт һәлакәтләре һәм аларны кисәтү буенча хисаплар белән чыгыш ясадылар.
- Юлларда аварияләр китереп чыгараучы узышчы шоферлар даими контрольдә булырга тиеш, алар белән профилактик әңгәмәләр үткәрергә кирәк, чөнки алар үзләрен болай тотарга тиеш түгел. Алар юллардагы җиңел фикерләү һәм җавапсызлыкның күңелсез нәтиҗәләргә китерергә мөмкин булуын һәм аларга закон алдында җавап бирергә туры киләчәген аңларга тиеш, - дип билгеләп үтте район башлыгы Илһам Кашапов.
Утырышта юл-транспорт вакыйгаларын тиз арада хәл итү өчен юл камералары эшен җайга салу турында карар кабул ителде. Шулай ук хокук тәртибен бозучылар белән формаль һәм формаль булмаган очрашулар уздырылачак. Балалар өчен юлларда үз-үзеңне тоту кагыйдәләре турында профилактик дәресләр үткәрүне дәвам итәчәкләр. Өлкән кешеләргә һәм балаларга шоферлар караңгы вакытта җәяүлеләрне күрә алсын өчен яктылыкны кире кайтаручы элементлар биреләчәк.
Киңәшмәдә кышкы чорга күчү сәбәпле, һава шартларының үзгәрүенә юллар әзерләү турында да фикер алыштылар. Яңа зоналарда җәяүлеләр өчен юл кичүләре билгеләнәчәк һәм тизлек чикләүләре урнаштырылачак.
- Бүгенге көндә егерме сигез берәмлек техника әзерләнде. Кар өемнәре зурая башлагач, без зур тракторлы тагын ике төягечне җәлеп итәбез, аларны федераль трассада эшләү өчен дә кулланабыз, - диде юл хезмәте башлыгы урынбасары Булат Ганиев.
Явым-төшем көчле булган очракка  районда «Буран» планы каралган. Ярдәмгә зур йөк машиналарының өстәмә техникасы җәлеп ителәчәк.
Район халкы сораулары һәм теләкләре белән башкарма комитет җитәкчесе урынбасары Рамил Шәйхетдинов чыгыш ясады. Алар барысы да каралды һәм тикшерүгә алынды.
Көн тәртибендәге иң актуаль мәсьәләләр белән киңәшмәләр даими рәвештә уза. Узган атнада Илһам Кашапов районыбызның авыл җирлекләре башлыкларын җыйды. Районның авыл җирлекләре территориясендә яңа агачлар утырту, үләт базлары территорияләренең торышы, котыру авыруын кисәтү, Өлкәннәр ункөнлеген үткәрү һәм оештыру  һәм башка мәсьәләләр турында фикер алыштылар