Үзең үстергән яшелчә тагын да тәмлерәк

Надеждино авылындагы бәрәңге кырында ике гаилә - Сабитовлар һәм Сафиннар эшли. Алар бергәләп дүрт гектар җирдән бәрәңге җыя, әлеге җирне алар үз эшләрен башлар, яшелчәчелек белән шөгыльләнер өчен сатып алганнар. Шуның өчен кирәкле техника да булдырганнар.
- Без үзебез шушы авылдан, гомер буе җирдә эшлибез, - ди Илсур Сабитов. – Менә хатыным белән биредә үз эшебезне башлап җибәрергә кирәк дигән карарга килдек. Ел әйләнәсе кыяр үстереп булачак теплицалар салырга телибез. Нәтиҗәдә, 1,5 миллион сумлык грант оттык. Бу акчалар материаллар сатып алуга һәм теплицаларны төзекләндерүгә китте. Ярдәм алу мөмкин хәл икән. Әйе, билгеле бер шартларны үтәргә, булачак теплицалар өчен җир сатып алырга, смета төзергә кирәк иде. Без барысын да исәпләдек, үлчәдек һәм башкарып чыктык. Безнең үз участогыбызда яшелчә үстерү тәҗрибәсе бар, аның да кирәге чыкты. Һәм менә – грант оттык.

2018 елда районда “Эш башлаучы фермер” федераль программасы буенча ике питрәчле грант алды, берсе – сөтчелек фермасы, икенчесе – үсемлекчелек өчен. Шулай ук терлек симертү буенча ике гаилә фермасы дәүләт ярдәме алды. Фермерларга ярдәм итү чаралары турында белергә теләсәгез, авыл җирлекләре башлыкларына, район авыл хуҗалыгы һәм азык-төлек идарәсенә мөрәҗәгать итә аласыз. Шулай ук ТР Авыл хуҗалыгы министрлыгы сайтында да мәгълүматлар урын алган.

- Һәркем өстәлендә химиясез, сыйфатлы итеп үстерелгән табигый чиста продуктлар булуын тели, - ди Илсурның тормыш иптәше Альбина Сабитова. – Шуңа күрә эшкәртелмичә һәм башка өстәмәләрсез үстергән яшелчәләргә һәрвакыт ихтыяҗ бар. Менә бу бәрәңгене бернинди ашламаларсыз үстердек, безнең уңыш яхшы, тәмле. Кыярны да шулай үстерәчәкбез.
Биредә теплицалар төзү – киләчәк эше, алар 1300 квадарат метр тәшкил итәчәк. Ә җир ул вакытка кадәр буш тормасын өчен, надеждинолылар участокларында бәрәңге үстерергә карар иткәннәр дә инде. Бу аларның шәһәрдәге танышлары өчен дә гаилә эшенә әверелгән, алар да Питрәч җирендә фермерлекны сайлаган.
Без үзебез шәһәрдән, биредә балаларга ярдәм итәбез, - ди пенсионер Габбаз Сафин. – Улыбыз Динар мондый карар кабул итүе турында сөйләгәч, без аны хупладык. Хәзер менә кулыбыздан килгәнчә булышабыз, уңыш җыябыз. Сыйфатлы продукция үстерү - яхшы, файдалы эш.
- Бу Надеждино авыл җирлегендә грант алган өченче фермер хуҗалыгы, - дип билгеләп үтә әлеге авыл җирлеге башлыгы Искәндәр Галәветдинов. - Бездә инде сарык фермасы эшли, икенче фермер грантын сөт җитештерүгә юнәлтте. Әлбәттә, авыл җирлеге өчен халыкның мондый активлык күрсәтүе бик яхшы. Һәм бу алар өчен үзләренә эшләү, үсеш алу мөмкинлеге.