“Айгөл” балалар бакчасында “Буыннар старты” район конкурсы узды

Юлда куркынычсызлык, ашыгыч хәлдә эш йөртә белү – бөтен гаилә үзләштергән күнекмәләр. “Айгөл” балалар бакчасында икенче тапкыр “Буыннар старты” район конкурсы узды. Чара барышында биш гаилә командасы юл хәрәкәте кагыйдәләрен белүләрен тикшерде.

Биремнәрнең берсе юл хәрәкәте кагыйдәләре буенча тест үткәрүдән гыйбарәт иде. Катнашучылар юл куркынычсызлыгы кагыйдәләрен бозучыларны ачыкларга, шулай ук юл-транспорт һәлакәтләре вакытында беренче ярдәм күрсәтү гамәлләрен тикшерергә тиеш иде. Бу сынауда әниләр һәм әтиләр юл-транспорт һәлакәтеннән соң беренче минутларда бик мөһим булган гамәлләрне башкардылар. Алар юл һәлакәтендә “зыян күрүчеләргә” повязка салды.

Йомгаклау сынавы велосипедта фигуралы йөртү булды. Анда әтиләр һәм аларның уллары катнашты. Аларга махсус билгеләнгән мәйданчыкта тоткарлыклар белән траектория буенча узарга, тигезлекне саклый һәм тизлекне контрольдә тота белүләрен күрсәтергә кирәк иде. Алар барысы да биремне уңышлы үтәделәр.

Нәтиҗәдә, Сорокиннар һәм Нурмөхәммәтовларның гаилә командалары лауреат булды, өченче урында – Владимировлар, икенче урында – Шәмсетдиновлар. Беренче урынны Исламовлар гаилә командасы алды. Барлык катнашучыларга да истәлекле бүләкләр тапшырылды.

Мондый чаралар файдалы гына түгел: алар гаиләләрне берләштерә һәм иң мөһиме – куркынычсызлыкка һәм үзара ярдәмләшүгә өйрәтә