Питрәчтә юл хәрәкәте иминлеге буенча район комиссиясе утырышы узды

РФ Эчке эшләр министрлыгының Питрәч районы буенча ЮХИДИ бүлеге башлыгы Вячеслав Цыганов билгеләп үткәнчә, 2020 ел нәтиҗәләре буенча район юлларында 13 кеше үлгән. Эчке юлларда юл-транспорт һәлакәтләренең артуы күзәтелә. Бу транспорт агымының артуы белән бәйле. Нигездә, «Казан-Шәмәрдән» автоюлында 16-21 километрда юл-транспорт һәлакәтләре күзәтелә. Бу киселештә 14 юл-транспорт һәлакәте булган, анда 7 кеше һәлак булган.
Комиссия әгъзалары район үзәгенең Молодежная урамында йөк автомобильләре хәрәкәте мәсьәләсен карадылар. Әлеге урамда яшәүчеләр белән уртак күчмә тикшерү барышында «йөк автомобильләре хәрәкәте тыела»  дигән билгеләр булуга карамастан, зур йөк машиналарын йөртүчеләрнең Молодежная урамы буйлап узулары ачыкланды. Әлеге мәсьәлә район ЮХИДИ бүлеге контроленә алынды.
Шулай ук авыл җирлекләреннән кисәтү билгеләре, ясалма юл тигезсезлекләре, тукталыш павильоннары, юлларны яктырту буенча берничә мөрәҗәгать каралды. Мәсәлән, Татар Тау Иле авылында яшәүчеләр ясалма тигезсезлекне һәм мәктәп янындагы җәяүлеләр кичүендә светофорның кисәтү сигналын куюны сорый.
Барлык мөрәҗәгатьләр буенча да ЮХИДИ, авыл җирлеге вәкилләре һәм юлны карап тотучы вәкилләр белән берлектә әлеге объектларны урнаштыруның максатчанлыгын һәм эш масштабларын билгеләү өчен урыннарга бару планлаштырылган.
Шулай ук  районда автошәһәрчек төзү кирәклеге турында да сөйләштеләр. Әлеге махсус корылмалар һәм юл хәрәкәтен оештыруның техник чаралары комплексы балаларны юлларда үз-үзеңне тоту кагыйдәләренә өйрәтү буенча гамәли дәресләр үткәрергә мөмкинлек бирәчәк.