Гаилә бәхетенең төп сере аңлашып яшәүдә

“Сине яратырга һәм сакларга, аңларга һәм хөрмәт итәргә, булышырга һәм сиңа ышанырга вәгъдә итәм”, – һәр гаилә менә шушы сүзләрдән һәм ике имзадан башлана. Әмма матур тантана – бу катлаулы тормыш юлында беренче адым гына. Бу юлны төрлечә үтәргә мөмкин. Моны һәркем үзенчә хәл итә. 
Бу ял көннәрендә безнең районда өч яңа гаилә барлыкка килде. Яшь өйләнешүчеләр паркында аларга законлы никахлашу турында таныклык тапшырдылар. Әлбәттә инде, һәр парга үзара аңлашып, бер-берсенә терәк булып яшәүләрен теләделәр. 
- Без туйны әлеге бәйрәмгә туры китерергә тырышмадык, аның җидесе көнне үтүен генә теләдек, чөнки безнең гаилә өчен бу үзенчәлекле мәгънәгә ия, - диләр Назгөл һәм Рәзил Зыятдиновлар. Алар аңлатуынча, җидесе көнне Рәзил армиягә киткән һәм нәкъ бер елдан соң шул ук көнне әйләнеп кайткан, бу сан белән башка вакыйгалар да бәйле. - Ә Гаилә көненә килгәндә, бу – очраклы туры килү генә, бәхеткә булсын, - ди алар. 
- Бер-берсен хөрмәт итсеннәр һәм кадерләсеннәр, - диләр шәле кызы Назгөлнең әти-әнисе Йолдыз һәм Солтания Мәннаповлар. Әлеге гади сүзләр акыллылык һәм тәҗрибә билгеләре, бер-береңне хөрмәт итмәсәң, бәхетле тормышны күз алдына китерергә мөмкин түгел. Мәннаповлар үзләре инде 34 ел бергә, шуңа күрә яшьләрнең үрнәк алырдай кешеләре бар. 
Паркта шулай ук гаилә бәйрәме дә булып узды, район башлыгы Илһам Кашапов һәркемне бәйрәм белән тәбрик итте. Ул Додосовлар гаиләсенә "Мәхәббәт һәм тугрылык өчен" дигән истәлекле медаль тапшырды. Татьяна Григорьевна һәм Виктор Иванович инде 48 ел бергә, алар өч бала үстерәләр, хәзер аларның бәхете - оныклары һәм оныкчыклары. 
"СтудФонд.РФ" проекты кысаларында, Питрәчнең иҗади гаиләсе -Зариповларны да бүләкләделәр. Моның өчен Питрәчкә Татарстан Республикасында "СтудФонд"ның координаторы Диана Демина килде. 
- Проект авыр тормыш хәлендә калган студентларга ярдәм күрсәтүгә, яшьләрне хуплауга юнәлдерелгән, - диде Диана Демина. - Ә хәзер без менә шундый актив, иҗади гаиләләрне дә колачларга, аларның зур эшләрен һәм яхшы үрнәк булуларын билгеләргә карар иттек. 
- Без һәрвакыт зур гаиләбез булу турында хыялландык һәм өч балабыз булуына бик тә шатбыз, - диләр Лилия һәм Радик. - Безнең гаилә бик иҗади һәм актив. Әниебез Яшьләр үзәгендә "Карамельки" вокал студиясен җитәкли, әтиебез хореограф булып эшләде, олы кыз Дилә музыка мәктәбен тәмамлады, кечеләр дә калышмый. 
Бүген исә барлык гаиләләргә үзара аңлашып яшәүләрен телибез, чөнки бәхетнең төп сере шунда. Моның өчен бер-береңне тыңлау һәм хуплау кирәк, шул вакытта бар да булачак. 
Питрәчнең тагын биш гаиләсенә Россия Пенсия фондыннан ана капиталына сертификатлар тапшырдылар. 
Шуннан соң, район мәдәният бүлеге хезмәткәрләре һәркемне паркта узган "Гаилә мохите"нә чакырды, анда конкурслар, мастер-класслар һәм күңелле ярышлар үткәрелде.