Колай китапханәсендә укучыларга «Идел-Урал» легионы батырлыгы турында сөйләделәр

Колай авылында Җиңүнең 80 еллыгы кысаларында «Снежный десант» эзләү отрядлары Ассоциациясе вәкилләре белән очрашу булды, аларның эше – хәбәрсез югалган солдатларның исемнәрен кайтару. Чара Президент грантлары фонды ярдәмендә гамәлгә ашырыла торган «Җиңүгә юл: «Идел-Урал» легионы подпольесы геройлары» масштаблы проекты кысаларында узды. Колай мәктәбе укучылары белән сөйләшүнең төп темасы – сугышның аз билгеле, әмма героик бите – «ИделУрал» легионының фашист Германиясенә каршы торуы булды.

Укучылар алдында «Снежный десант» эзләү отрядлары Ассоциациясе директоры Айдар Гафиятуллин, «Пламя» эзләү отряды командиры һәм Олы Кабан мәктәбе педагогы Владимир Чуприн чыгыш ясады. Алар сугыш кырларында һәлак булган солдатларның исемнәрен кайтаручы эзләү отрядларының мөһим миссиясе турында сөйләделәр. Олы Кабан урта мәктәбе укучылары күңелгә үтеп керерлек әдәби-музыкаль композиция башкардылар.

Очрашуны оештыручыларның берсе, якташыбыз 1991 елдан «Снежный десант»та катнашучы Алексей Сергеев колайлылар өчен тере легенда. Яшьләргә мөрәҗәгать итеп, ул аларга батырлар истәлеген хөрмәтләүләрен һәм мәңгеләштерүләрен теләде.

Очрашу импровизацияләнгән музей экспозициясе янында тәмамланды. Барлык теләүчеләр отрядлары тарафыннан экспедицияләр вакытында табылган уникаль артефактларны якыннан карый алдылар. Биредә һәр әйбер – батырлыкның сүзсез шаһиты, дистә еллар узгач та алар безнең белән сөйләшүен дәвам итә.