Питрәч районы мәктәпләрендә соңгы кыңгырау чыңлады

Бу бәйрәм шатлыклы да, шул ук вакытта моңсу да булды, хәтта кичәге укучылар күз алдында үсеп, олыгаеп киткәндәй тоелды. Без Питрәч беренче мәктәбендә соңгы кыңгырау бәйрәмендә булдык.

Чара яшьләрчә дәртле һәм динамик, шул ук вакытта күңелләрне нечкәртердәй булды. 113 дүртенче сыйныф укучысы өчен бу башлангыч мәктәп белән саубуллашу аккорды булды: алда яңа кабинетлар һәм фән укытучылары белән танышу. 84 тугызынчы сыйныф укучысы мөстәкыйльлеккә беренче адым ясады – күпләр мәктәп формасын һөнәри формага алыштырырга әзер, техникумнар һәм лицейлар сайлады инде. Ә 30 унберенче сыйныф укучысы 11 ел уртак тарих, беренче җиңүләр һәм чын дуслыкны калдырып, олы тормыш бусагасын атлап керә.

Линейка хис-кичерешләр белән тулы иде. Балалар үзләренең беренче сәхнә чыгышлары белән һәркемне дулкынландырдылар, тугызынчы сыйныф укучылары традицион мәктәп вальсы әйләнделәр, ә 11 нче сыйныф укучыларының хушлашу биюе чын мәгънәсендә ачыш булды.  Егетләр, кызлар биюне шулкадәр оста итеп, күңелләргә үтеп керерлек итеп башкарды, хәтта күпләрнең  күзләре яшьләнде.

Ата-аналар һәм педагоглар җавапсыз калмады һәм алар үзләреннән җыр бүләк иттеләр, шуның белән алар  яшь энергия бетмәвен, ә һәр юлда чын күңелдән бәхетле юл теләүләрен күрсәттеләр. Мәктәп директоры Нина Утяганова дулкынлануын яшермәде: 

– Бу көн ел саен дулкынланырга мәҗбүр итә, син бит беренче сыйныфтан ук белем биргән укучыларны озатасың. 

Ата-аналар остазларына рәхмәт белдерде, чыгарылыш укучылары “бер үк вакытта елыйсы да, көләсе дә килә” диде, ә педагоглар укучыларына хәерле юл теләде.

Кыңгырау чыңлый. Мәктәп еллары артта калды, алда – БДИ, югары уку йортлары, һөнәрләр һәм зур тормыш. Бу май көнендә җыелганнарның барысы да шуны яхшы аңлый: беренче кыңгырау аларны кайчандыр мәктәпкә алып килгән, ә соңгысы мәңгегә шушы стеналар белән бәйләгән.