Питрәч районында ике телдә белем бирүче яңа балалар бакчасы ачылды

Фото: © Люция Сираҗиева / «Питрәч-информ»

Көек авылында “Елмаю” исемле өченче балалар бакчасы барлыкка килде. Ул “Яшьлек” торак комплексы территориясендә урнашкан. Әтиәниләрнең зур ихтыяҗларын исәпкә алып, әлеге объектны кыска вакыт эчендә төзегәннәр. Елның беренче аенда эшкә тотынганнар, ә инде соңгы аенда анда сабыйлар йөгереп йөри.

– Мин монда 16 гыйнварда буш кырга килдем, – дип сөйли төзелеш участогы башлыгы Айвар Гарипов. – Һава торышының нинди булуын искә төшергән саен, сискәнеп китәм – 20 градус салкын, җилле. Балалар бакчасына чират белән бәйле кискен хәлне белеп, без барысын да тиз һәм сыйфатлы эшләргә тырыштык.

Балалар бакчасы 14 төркемгә бүленгән өч яшьтән алып җиде яшькә кадәрге 390 балага исәпләнгән. Һәркайсының урамда үзләренең каплаулы урыны бар, анда яңгырдан һәм җилдән яшеренеп була. “Елмаю” 260 урынлы булырга тиеш иде, ләкин иганәчелек акчалары хисабына аларның санын арттырдылар.

Хезмәткәрләр штаты тулысынча формалашкан. Коллектив 21 педагогтан тора. Мәктәпкәчә учреждение билингваль, ягъни монда тәрбияләнүчеләрне рус һәм татар телләрендә укытачаклар. Балалар бакчасында “Стеналар сөйли” инновацион проекты гамәлгә ашырыла. Ул стеналарга рус һәм татар телләрендә язылган хайваннар, кошлар, агачлар, үсемлекләрнең төсле сурәтләреннән гыйбарәт. Мәсәлән, ворона-карга, олень-болан, барсук-бурсык. Әгәр дә укытучы дәрестә моны арыганчы кабатласа да, бала көн саен зур хәрефләр һәм ачык рәсемнәр яныннан узганда күргәннәрен яхшырак истә калдырачак.

Коридорларның берсенең стенасын милли киемнәрдәге ир-ат һәм хатын-кыз силуэтлары бизи, алар арасында мордвалар һәм удмуртлар бар, ә янәшә өстәлдә шундый ук киемдәге курчаклар урнаштырылган. Тәрбиячеләр халыкларның мәдәниятен һәм гореф-гадәтләрен өйрәнүгә басым ясыйлар.

Декреттан эшкә чыгарга вакытлары җиткән яшь ата-аналар өчен бу күптән көтелгән вакыйга. Олылар гына түгел, балалар да түземсезлек белән көттеләр. Елена Стюфееваның кече кызы Настя апасы Василисага көнләшеп караган, ул көн саен матур итеп киенеп “Сказка” балалар бакчасына китә.

– Аны озаткач: "Ә мине кайчан алачаклар? Мин дә бакчага барырга телим”, дип сорый иде, – дип сөйләде аның әнисе. – Минем кызыма өч яшь тулды, һәм без шушы искиткеч яңа балалар бакчасына эләктек. Ул беренче көнне үк килергә бик теләгән иде, ләкин төнлә йөткерә башлады, авырып китте. Ул бик күңелсезләнде, елады. Мин аны тынычландырдым һәм терелүгә үк илтермен, дидем.

Тантаналы ачылыш вакытында ТР Мәгариф һәм фән министры Илсур Һадиуллин мәктәпкәчә учреждение җитәкчесенә компьютер җиһазлары алу өчен 150 мең сумлык сертификат тапшырды.