Питрәч районының һәр мәктәбендә театр түгәрәге эшли

Мәдәният сараенда “Бала шәхесен социализацияләүдә мәктәп театрының роле” темасына республика семинары узды. Анда мөхтәрәм кунаклар, укытучылар һәм укучылар катнашты.

Чараны “Әкияттә кунакта” композициясе ачып җибәрде. Питрәч беренче мәктәбенең өченче сыйныф укучысы Тимур Хәмәтшин “Шүрәле” әкиятендәге персонажны күрсәтте.

– Бу Шүрәлене алдаган кеше, – диде малай. Тимур үзенә төрле рольләрне уйнау ошавын һәм кызыклы булуын әйтте.

Аларның мәктәп театры җитәкчесе – Энҗе Миннимуллина. Түгәрәк ике ел эшли, балалар үзләренең мәктәпләрендә төрле чараларда чыгыш ясыйлар. Яшь артистларның төп составы – 3-4 сыйныфлар. Ләкин югары сыйныф укучылары да җәлеп ителә. Алар татар телендә дә, рус телендә дә спектакльләр куялар.

– Балаларга бик ошый, кайчакта аларга рольләр дә җитми, – ди җитәкче. – Безнең заманда бу буынны театр белән мавыктыру мөһим. Хәзер без актив рәвештә 9 Майга сәхнәләштерелгән күренеш әзерлибез.

Күргәзмәне караганнан соң кунаклар семинар башланган залга үттеләр. Сәламләү сүзендә мәгариф бүлеге башлыгы Дарья Юматова сөйләгәнчә, безнең районда һәр белем бирү йортында мәктәп театр студиясе эшли.

– Бүгенге көндә өстәмә белем бирү күләме 80 проценттан артып китә, – дип ассызыклады ул. – Нәкъ менә өстәмә белем алу, аерым алганда, театр студияләре, балаларның талантларын ачарга ярдәм итә.

Чыгыш ясаучылар үзләренең тәҗрибәләре турында сөйләделәр – мәктәп театр студияләре җитәкчеләре презентацияләр һәм иҗади номерлар белән уртаклаштылар. Көек авылындагы “Алгоритм” лицееның “Аппофеоз” театр студиясе Тукайның авыр балачагын һәм яшьли вафат булуын сәхнәдә күрсәтте. 4 яшьлек Габдулланы беренче сыйныф укучысы Кәрим Гыйләҗев уйнады.

– Миңа чыгыш ясау җиңел булды, хискичерешләрне белдерү авыр булмады, – ди Кәрим. – Без озак әзерләнмәдек, сәхнәләштерелгән күренеш җиңел булды. Театр укуга комачауламый, киресенчә, ярдәм итә. Мин текстларны тиз өйрәнәм. Бер тапкыр 15 куплет өйрәндем.

“Аппофеоз” җитәкчесе – Мария Сайкина. Студиядә 100дән артык бала шөгыльләнә.

– Театр – иҗат берлеге ул, – дип билгеләп үтә ул. – Балалар җырлый да, бии дә. Без дөрес сөйләшергә, декламация ясарга, сулыш алырга, бергә эшләргә өйрәнәбез.

Семинар Татарстан Республикасының атказанган артисты, Тинчурин исемендәге Татар дәүләт театры актрисасы, ЛениноКокушкино кызы Гөлназ Нәүмәтованың актерлык осталыгы буенча мастеркласс белән тәмамланды.