Питрәч укытучылары укучыларның потенциалын ачу турында сөйләде

Елена Егошина, Питрәч беренче мәктәбенең рус теле һәм әдәбияты укытучысы

Хәзерге заманда укучыларның югары казанышлары – медаль, БДИның югары баллары – белем бирү процессы сыйфатының мөһим күрсәткече булып тора. Имтиханнарга йомгак ясалды, аттестатлар алынды, барлык дулкынландыргыч моментлар артта калды. Һәм күпләргә быелгы чыгарылыш сыйныф укучыларының кайсысы бердәм дәүләт имтиханында иң күп балл җыючы булуын белү кызык?

Ел саен бөтен ил буенча чыгарылыш сыйныф укучылары арасында БДИда 100 балл җыючылар бар. Күпләр моны тумыштан килгән сәләт яки бәхет нәтиҗәсе дип уйлый. Әмма һәрбер шундый уңыш артында укучының үзенең генә түгел, ә аның укытучылары, ата-аналары һәм хәтта тулаем бөтен мәктәпнең дә зур хезмәте тора. Балага максималь нәтиҗәгә ирешергә ничек ярдәм итәргә соң? Бары тик югары мотивацияле укучылар гына уку процессына югары дәрәҗәдә җәлеп ителү, мөстәкыйльлек, белемгә кызыксыну, җаваплылык һәм даими камилләшү теләген күрсәтәләр.

Йөз балл җыючылар – вундеркиндлар да, гаҗәеп сәләтләр белән туган генийлар да түгел. Еш кына бу гап-гади, ләкин бик тырыш балалар. Алар бәхеткә өметләнмиләр, ә системалы рәвештә әзерләнәләр: дистәләгән сынау вариантларын чишәләр, хаталарын тикшерәләр, педагоглар белән киңәшәләр һәм нәрсәнедер аңламаган чакта ярдәм сорарга курыкмыйлар. 100 балл – очраклылык түгел, ә даими эш нәтиҗәсе.

– Уңышның сере – даимилек, – ди химиядән 100 балл җыйган “Алгоритм” лицееннан Артем. – Мин көн саен, хәтта ял көннәрендә дә шөгыльләнә идем. Һәм иң мөһиме – миңа предмет ошый иде, мин моны аңларга теләвемне тойдым.

Күп кенә йөз балл җыючылар билгеләп үткәнчә, укытучылар, ата-аналар ярдәменнән башка мондый нәтиҗәгә ирешү мөмкин булмас иде.

– Минем әдәбият укытучым миңа хәтта үзем шикләнгәндә дә ышана иде, – дип уртаклаша “Алгоритм” лицееннан Полина. Ул мине, идеалга ирешкәнче, иншалар язарга мәҗбүр итте.

– 100 балл – финиш түгел, ә старт, – дип ышана беренче мәктәптән Максим. – Алда әле максатлар күп, һәм без яңа чакыруларга әзер.

Йөз балл җыючыларның тарихлары БДИда югары нәтиҗә – фантастика түгел, ә чынбарлык икәнен исбатлый. Иң мөһиме – могҗизага өметләнү түгел, ә планлы рәвештә максатка бару. Һәм ул вакытта хәтта зур булмаган мәктәптән гади укучы да йөз балл җыючы була ала.

Аларның уңышы – очраклылык түгел, ә тырыш хезмәт, дисциплина һәм белемгә мәхәббәт нәтиҗәсе.

Екатерина Блаченова, Ленино-Кокушкино мәктәбенең математика укытучысы

2024 елда Татарстанда “Физик-математик алгарыш” масштаблы белем бирү проекты старт алды. Аның максаты – мәктәп укучылары арасында төгәл фәннәрне популярлаштыру, белем дәрәҗәсен күтәрү һәм педагогларга ярдәм итү. Проект укытучылар һәм укучылар өчен грант ярдәмен үз эченә ала.

Ул укытучыларга һәм укучыларга методик ярдәм күрсәтә һәм менторлар, онлайн-укытучылар аша реаль ярдәм күрсәтә. Түгәрәк укытучылары арасында челтәрле багланышлар бик яхшы җайга салынган. Уку елы дәвамында укучылар төрле олимпиадаларда, конференцияләрдә катнаштылар, Иннополис университетында математика фестивалендә булдылар. Анда балалар Россиянең иң яхшы математика һәм физика укытучылары белән очраштылар, логик мәсьәләләр чиштеләр һәм үзара актив рәвештә тәҗрибә уртаклаштылар.

Әлеге проектта районыбыз мәктәпләре дә катнашты. Ленино-Кокушкино мәктәбе, Питрәч 1 нче мәктәбе һәм “Алгоритм” технологик лицее базасында узган уку елыннан ук төгәл фәннәр буенча тирәнтен әзерләүдә махсуслашкан “Школково” Мәскәү онлайн-платформасы белән берлектә көндезге-читтән торып уку түгәрәкләре ачылды һәм эшләде. Яшь укытучылар һәм тәҗрибәле педагоглар конкурс сайлап алуында мәктәпләрдә математика белемен үстерү проектларын һәм педагогик эшчәнлекнең нәтиҗәлелеген тәкъдим иттеләр.

Быел июнь аенда әлеге проект кысаларында грантларга ия булган укытучыларның исемнәре билгеле булды, алар арасында Питрәч районыннан укытучылар һәм укучылар да бар. “Физик-математик алгарыш” проекты ярдәмендә мәктәп укучыларында төгәл фәннәргә кызыксыну арта, ә педагогларда һөнәри үсеш өчен яңа мөмкинлекләр барлыкка килә. Бу балаларның талантларын ачарга ярдәм итеп кенә калмый, шәһәр һәм авыл мәктәпләре арасындагы аерманы да киметә, укучыларга фәнгә һәм югары технологияләргә юл ача.

Лада Голубева, Богородск мәктәбенең рус теле һәм әдәбияты укытучысы, "Россиянең Ел укытучысы-2025" конкурсының зона этабында “Ел укытучысы” номинациясендә җиңүче

“Ел укытучысы” конкурсы бөтен педагогик бергәлек өчен зур әһәмияткә ия. Ул талантлы, иҗади, креатив педагогларны ачыкларга мөмкинлек бирә, алар башкалар өчен үрнәк була, укытучы һөнәренең абруен күтәрә.

Миңа Татарстанда “Россиянең 2025 ел укытучысы” конкурсында катнашу бәхете насыйп булды. Дөресен генә әйткәндә, минем катнашуымның билгеле бер миссиясе булмады, миңа бик кызык булды. Барысы да дулкынланудан һәм беркадәр шикләнүдән башланды. Мин моның җитди сынау икәнен аңлый идем, әмма шул ук вакытта энтузиазм һәм үземнең иң яхшы профессиональ сыйфатларымны күрсәтү теләге көчле иде. Конкурсның һәр этабы минем өчен ниндидер дәрес булды, аннан соң мин үземнең көчле һәм йомшак якларымны анализладым, үз потенциалымны ачарга тырыштым. Минем шәхси җиңүем балаларның кызыксынуы һәм рәхмәте булды.

“Ел укытучысы” конкурсында катнашу миңа призлы урын алу мөмкинлегеннән дә күбрәк бирде. Бу онытылмас хис-кичерешләр, һөнәри үсешкә һәм үзүзеңне үстерүгә көчле этәргеч, бәяләп бетергесез тәҗрибә, үз казанышларыңны күрсәтү, үзеңә яхшырак һәм ышанычлырак булу мөмкинлеге. Конкурсның үзенчәлекле, дустанә һәм уңайлы атмосферасын билгеләп үтәргә кирәк, анда көндәшлек сизелми иде.

Мин конкурсны җылы хисләр белән искә төшерәм һәм һәр укытучы мондый сынауда үз көчен сынап карарга тиеш дип саныйм.

Нурзия Исламгараева, Күн урта мәктәбе директоры

Нык таләпчән, төгәл, гадел... 2017 елның маенда билгеләнгән яңа директорны Күн мәктәбе коллективы сагаеп каршы ала. Әмма Нурзия Гашыйгулла кызы Исламгәрәева үзен беренче көннән үк коллективны бергә туплый алырлык тәҗрибәле, эрудицияле, талантлы җитәкче буларак күрсәтә. Аның төп максаты – укучылар, укытучылар, ата – аналар өчен уңай психологик мохит тудыру. Ул яшь укытучыларга да, өлкән яшьтәгеләргә дә үрнәк булып тора, эш тәҗрибәсен алар белән теләп уртаклаша, аларга методик ярдәм күрсәтә.

Татар Тау Иле авылында туып-үскән кыз 9 еллык мәктәпне тәмамлагач Арча педагогика көллиятендә белем ала. Укуын уңышлы тәмамалагач Кибәк Иле авылында башлангыч сыйныфлар укытучысы итеп эшкә билгелиләр. Беренче көннән эшен чын күңелдән яратып, бөтен белемен, энергиясен, көчен кызганмыйча башкара ул. Тирән белемле, гел яңалыкка омтылучы яшь укытучыны балалар да бик тиз үз итә, аңа тартыла, дәрес темаларын яратып, игътибар белән тыңлый. Үтә тырыш, максатына ирешүчән белгечнең намуслы хезмәте мәктәп дирекциясе тарафыннан да игътибарсыз калмый – Нурзия Гашыйгулла кызы мәктәп директорының уку-укыту эшләре буенча урынбасары итеп билгеләнә, соңрак, 2004 елда, директор вазифасына билгеләнә. Авыр, күп көч-энергия, сабырлык, түземлек, акыллылык таләп итүче вазифаны да яратып башкара ул. Күп еллар җитәкче булып эшләү дәверендә Нурзия Гашыйгулла кызы югары дәрәҗәдә белемле белгеч, катлаулы мәсьәләләрне хәл итүдә үзен инициативалы һәм җаваплы җитәкче итеп таныта, лидерлык сыйфатлары булган җитәкченең профессиональ әзерлеге һәм белеме, тәҗрибәсе куелган таләпләргә тәңгәл килә. Сабыр, төпле фикерле, тәрбияле, әдәпле, гадел…. 30 ел дәвамында укытучыларга хас булган барлык сыйфатларны үзендә туплаган Нурзия Гашыйгулловна тормышның төрле этапларын үтеп, яшь буынны тәрбияләүдә фидакарь, батыр хезмәте белән кешеләрнең рәхмәтен, ихтирамын яулый. Ул үз вазифасын төгәл итеп, җиренә җиткереп башкара, шуңа күрә дә коллективта, район җитәчелеге һәм педагоглары, киң җәмәгатьчелек арасында олы хөрмәт казана. Нәкъ менә аның кебекләр турында “зур хәрефтән җитәкче”, “укытучылар укытучысы” диләр. Алга куелган максатларын бары тик уңай хәл итәргә өйрәнгән директор җитәкчелек иткән елларда Күн мәктәбенең материаль-техник базасы да яңартыла, мәктәп тирәсе яңа койма белән уратып алына, ашханәгә капиталь ремонт, пожар сигнализациясе системасы, электр челтәренә ремонт ясала. Хезмәттә үзен бары тик уңай яктан күрсәткән Нурзия Гашыйгулла кызы гаиләсендә үрнәк әни һәм яхшы тормыш иптәше. Аның педагогик эшчәнлеген хуплап, һәрдаим ярдәм итеп, киңәшләшеп яшәүче тормыш иптәше белән бергә ике кыз тәрбияләп үстерәләр. Олы кызы әнисе юлын дәвам иткән, бүгенгесе көндә Казан мәктәбендә эшли. Нурзия Исламгәрәева 50 яшьлек юбилеен каршылаучы, көчле энергетикалы, һәркемгә барып җитә торган кайгыртучан, җылы сүзле, киңәшле, нинди генә кыен очракта да зирәк һәм акыллы чишелеш таба белүче, эзләнүчән, гел алга – яңалыкка омтыла торган тынгысыз холыклы, хезмәт сөючән җитәкче.