Питрәч укытучысы Флюра Баязитова: «Без балаларны бик яратабыз»

Аның өчен һөнәре чын мәгънәсендә язмышына әверелгән. Ул үзенең төп принциплары: балаларда намуслылык тәрбияләү һәм хәзерге дөньяда туган телне саклау өчен көрәш турында сөйләде.

Бала чагында ук кечкенә Флюра дус кызлары белән укытучы булып уйнарга яраткан, моның өчен әтиәнисе аңа хәтта сыйныф тактасы да ясап биргән. Балачак уены аның язмышын билгеләгән.

– Без укытучыларыбызга охшар өчен әниләребезнең туфлиларын кия идек. Шулай итеп җиде дус кызның алтысы укытучы булып китте, – дип елмаеп искә ала Флюра Сәйфетдин кызы.

Һөнәр сайлауда аның сыйныф җитәкчесе Минзифа Хәсәнова хәлиткеч роль уйный.

– Ул беркайчан да бернидән дә курыкмады. Барысын да күзгә-күз карап сөйләде. Һәм безне дә һәрвакыт дөресен сөйләргә өйрәтте. Хәзер мин дә балаларны шуңа өйрәтәм, бу хәйләгә караганда күпкә яхшырак.

Моннан 35 ел элек салынган бу принцип Флюра Баязитованың үзе өчен дә әхлакый нигез булып тора.

Дөрес, икътисадчы-информатик һөнәрен сайлаган кызы Алинә бервакыт әнисенә: “Әни, нигә син мине шулай тәрбияләдең? Миңа яшәү авыр, мин бөтенләй алдый белмим”, дигән.

Минзифа Гыйльмиевна нигез салган дуслык әлегә кадәр дәвам итә — һәр биш ел саен классташлар очрашып тора, элемтәләрне өзмиләр.

Флюра Баязитова бүгенге көндә рус сыйныфларында татар теле һәм әдәбияты укыта. Бу заман таләбе. 2023 елда аның 18 укучысының 16сы имтиханны “дүрт” һәм “бишле” билгеләренә тапшырган, моның өчен педагог ТР Мәгариф министрлыгының Рәхмәт хатын алган. Ләкин укытучы фикеренчә, балаларның мотивациясе түбән.

Фото: © Люция Сираҗиева / «Питрәч-информ»

– Балалар хәзер бик иркә. Кайвакыт: "Миңа сезнең татар телегез нигә кирәк?" дип бәхәсләшә башлыйлар. Дөресен әйткәндә, үзләре русча да бернәрсә дә укымыйлар, – дип борчылып әйтә педагог.

Аның төп аргументы – татар теленең Татарстан Республикасында дәүләт теле статусына ия булуы. Әмма ул балаларга аңлаешлы тормыш мисалларын да таба.

- Авыр сыйныфта эшләдем, татар телен өйрәнергә бөтенләй теләмиләр иде. Мин: “Әгәр татар кызына өйләнсәң, ничек сөйләшерсең?" – дим. Укучым миңа карады да: “Ну, русча”, – ди. “Әгәр хатыныңның әнисе сине аңламаса?” дим. Уйланып калды.

Мөгаллим борчулы тенденцияне билгеләп үтә: бүген күп кенә татар гаиләләре дә балаларының тормышын җиңеләйтәбез дип ялгыш уйлап, рус телле төркемне сайлыйлар, аннары балалар үз туган телләрен чит тел буларак өйрәнәләр. Әти-әниләр шулай итеп буыннарның бәйләнешен өзүләрен аңламыйлар. Бу “җиңел” юл бик авыр югалтуга — мәдәни кодны тапшыруның табигый механизмын югалтуга китерә, баланы үз халкының тулы хокуклы варисы булу хокукыннан мәхрүм итә.

Балаларда кызыксыну уяту өчен Флюра Баязитова татар әдәбиятыннан кыюлык һәм батырлык мисалларын китерә: 27 ел гомере эчендә мәңгелек әсәрләр иҗат иткән Габдулла Тукайны, фашист төрмәләрендә иҗат иткән Муса Җәлилне, каты имгәнсә дә, авырлыкларга бирешмичә, даһи шагыйрь булып киткән Фәнис Яруллинны.

Укытучы эше гади булмаса да, Флюра Сәйфетдин кызы үзен башка урында күз алдына китерә алмый.

– Без, укытучылар, балаларны бик яратабыз. Яратмасак, бу һөнәрдә шулкадәр еллар эшли алмас идек.

Аның стажы – 33 ел. Ул хезмәттәшләренең ихтирамына лаек, аның хезмәте республика дәрәҗәсендә билгеләп үтелә. Әлбәттә, чын укытучы өчен иң мөһиме – укучыларының күңелендә калдырган эз, тел матурлыгына мәхәббәт, бөек әдәбиятка хөрмәт һәм намуслылык.