Питрәчлеләр “Җиңү диктанты” язды

Питрәч районы Бөек Ватан сугышы вакыйгалары темасына Халыкара тарихи диктант язуда катнашты. Яңа Шигали авылындагы “Прогресс” күппрофильле лицеенда биремнәрне 60 югары сыйныф укучысы чиште. Укучыларга СВО ветераны Азат Әгъзамов та кушылды. Азат Әгъзамов үз илебезнең тарихын һәм якташларыбызның батырлыкларын онытырга ярамый, дип саный. Ул Михаил Ломоносовның: “Үткәнен белмәгән халыкның киләчәге юк”, – дигән сүзләрен искә алды.

– Бу кешелек тарихында иң зур сугыш, һәм безнең бабаларыбыз җиңгән. Минем анда ике бабам катнашкан: берсе 42 нче елда һәлак булган, икенчесе сугышны тулысынча узган. Мондый акцияләр балалар үзләренең ата-бабаларын истә тотсын өчен кирәк, – ди ветеран. Аның күкрәгендә – “Батырлык өчен” медале.

Азат Әгъзамов, тарих белән кызыксынуына һәм күп нәрсәне белүенә карамастан, биремнәрнең җиңел булмавын билгеләп үтте. Чыннан да, укучылар үзләре әйткәнчә, сораулар катлаулы. Унынчы сыйныф укучысы Искәндәр Җиһаншин билгеләп үткәнчә, материалларда иллюстрацияләр рәвешендә күрсәтмәләр булган: хәрбиләр һәм галимнәр портретлары, танылган шәһәрләр сурәтләре.

– Барлык сораулар да таныш кебек тоела, – ди Искәндәр. – Мәсәлән, СССР шәһәрләренең исемнәрен Кызыл Армия гаскәрләре азат иткән хронологик тәртиптә урнаштыру. Мин тарихны яхшы беләм, чөнки безнең укытучылар яхшы.

Диктантны аудиториядә тарих һәм җәмгыять белеме укытучысы Вероника Доронина үткәрде.

– Биремнәрдә мәктәп программасы буенча үткәннәр дә, шулай ук аннан тыш биремнәр дә бар, – дип сөйли ул. – Безнең мәктәп базасында башлангыч хәрби әзерлек бар, “Герой варислары” командасы оештырылды, шуның нәтиҗәсендә безнең балалар хәтта иң катлаулы биремнәргә дә әзер.

Акциядә районның башка укучылары да катнашты. Катнашучылар үз нәтиҗәләрен “Җиңү диктанты”ның рәсми сайтында карый алачак.