Питрәчтән яшь тикшеренүчеләр үзләренең авторлык проектларын тәкъдим иттеләр

Укытучы Светлана Усмаева (уртада) конференция призеры Алинә Сабирова (сулда) һәм җиңүче Камилла Стрелец (уңда) белән.

Көек авылында “Алгоритм” технологик лицее базасында “Технологик лидер” районара фәнни-гамәли конференциясе узды. Бөек Ватан сугышында Җиңүнең 80 еллыгына багышланган чара Питрәч районы һәм Казан мәктәпләреннән яшь тикшеренүчеләрне бергә җыйды.

“Технологик лидер” конференциясе дөньяга фәнни карашны, мәктәп укучыларының танып белү активлыгын һәм һөнәри үзаңын үстерүгә юнәлдерелгән. Катнашучылар “Сугыш китергән технологияләр”, “ТЕХНОстарт” фәнни-техник проектлары”, “Мин – тикшеренүче”, “Техник проектлау һәм модельләштерү”, “Киләчәк буыннар күзлегеннән җиңүчеләр” кебек төрле секцияләрдә үз эшләрен тәкъдим иттеләр.

Конференциядә 200дән артык проект тәкъдим ителде. Укучылар химия, технология, математика, инглиз теле, әдәбият, җәмгыять белеме, музыка һәм башка фәннәр өлкәсендәге тикшеренүләрен күрсәттеләр. “Алгоритм” лицеенда әдәбият укытучысы Светлана Усмаева үз тәэсирләре белән уртаклашты: – Конференция сәләтле балаларга үзләренең потенциалларын ачарга ярдәм итә. Тикшеренү эшен әзерләү генә түгел, аны жюри каршында сорауларга җавап биреп яклау да мөһим. Шунысы сөендерә, быел конференция районара булды, һәм без киләсе елда ул республика дәрәҗәсенә чыгар дип өметләнәбез.

Конференция җиңүчеләре арасында – Светлана Усмаеваның укучысы Камилла Стрелец, ул “Сергей Есенин лирикасында хисләр чагылышы” тикшеренүен тәкъдим итте.

– Проектлар белән чыгыш ясаучы балаларга сораулар бирү – ул үзе сәнгать, – дип билгеләп үтә Светлана Усмаева. – Монда такт, сабырлык һәм балаларны ишетә белү, кызыксыну күрсәтү мөһим. Баланы киләсе елда үзенең яңа эше белән килү теләгеннән берничек тә мәхрүм итмәскә, аның фәнни эшкә кызыксынуын һәм мотивациясен хупларга кирәк. Балаларның чыгышларыннан алган тәэсирләр бик уңай, үҗәтлекне, теманы камил үзләштерүне һәм көндәшләребезнең гадәттән тыш харизмасын билгеләп үтәсе килә.

Җиңүчеләрнең башка кызыклы проектлары:

“ПВО периметр шәһәрләрен саклау өчен БПЛАны ачыклау һәм аңа каршы торуның интеллектуаль системасы" (Ибраһим Әхмәдуллин, “Алгоритм” лицее, Көек авылы);

“Үсемлекләр – сугыш геройлары” (Эмилиан Фардалов, Камалиев исемендәге лицей, Яңа Шигали авылы);

“Бөек Ватан сугышында сугыш макеты” (Дмитрий Изморосин, Алинә Котова, “Алгоритм” лицее, Көек авылы);

“Имин таган” (Ранэль Рөстәмов, Диана Рогова, 30 нчы мәктәп, Казан шәһәре);

“Тәгәрмәчле кунакханә” (Раил Зиадуллин, 30 нчы мәктәп, Казан шәһәре).

Жюри составына “Россия танкистлар берлеге” Бөтенроссия иҗтимагый хәрәкәте башкарма комитеты рәисе Альберт Гыймалетдинов керде.

– Бүген яшь буынны техник һәм тикшеренү эшчәнлегенә җәлеп итү мөһим. Күп кенә эшләре сугыш чоры технологияләренә һәм җиңүче геройларга багышланган. Катнашучылар арасында илнең оборона сәләтенә өлеш кертәчәк булачак конструкторлар һәм инженерлар бар, – дип ассызыклады ул.

Конференция җиңүчеләре һәм призерлары грамота һәм дипломнар белән бүләкләнде, ә һәр катнашучы таныклык алды. Оештыручылар конференция ел саен үткәрелә торган традициягә әверелер һәм укучыларның фәнни потенциалын үстерүгә ярдәм итәр дип ышаныч белдерделәр.