Питрәчтән табиб-инфекционист: «Үзем дә ел саен гриппка каршы прививка ясатам»

Көз – гриппка каршы вакцинациягә старт бирү өчен традицион вакыт. Ни өчен бу процедурага шундый зур игътибар бирелә һәм ул кемгә кирәк? Бу хакта Питрәч район үзәк хастаханәсе табибинфекционисты Ева Зверева сөйләде.

Фото: © Зөһрә Галимуллина / «Питрәч-информ»

– Ева Дмитриевна, грипп ни өчен шулай куркыныч?

– Без гриппка каршы вакцинациягә зур игътибар бирәбез, чөнки кайбер категория гражданнарның нәкъ менә авыру барышында өзлегүләре бар. Мондый категорияләргә кече яшьтәге балалар, хроник авырулары булган кешеләр керә, аерым алганда, бу гипертония, шикәр чире, хроник үпкә авырулары һәм иммунодефицит халәтләре.

Гриппның иң авыр нәтиҗәләре – ул, әлбәттә, төрле токсик синдромнар. Дистресс-синдром дигән төшенчә бар, ягъни бу авыр сулыш, шок халәте. Әмма бу инде реанимациягә карый.

Авыр халәтләрне булдырмас өчен, нәтиҗәле һәм тикшерелгән ысул – вакцинация.

– Прививка ясатканнан соң авырырга мөмкинме?

– Прививка ясарга һәм авырырга мөмкин, әмма бу 100 процент бактериаль өзлегүләрдән сакланырга ярдәм итә. Гадәттәге грипп, мәсәлән, кискен фазада биш көн бара. Вакцинация вакытында бу чор кыскара яки күпкә җиңелрәк уза. Конкрет вакцинаны сайлауны пациентның яшен һәм аның индивидуаль үзенчәлекләрен исәпкә алган табибка ышанып тапшыру яхшырак.

– Кемгә прививка ясарга ярамый?

– Каршы күрсәтмәләр бар, ләкин алар бик аз. Аерым алганда, бу ниндидер авыруларның кискен барышы яки хроник авыруларның кискенләшүе. Температура белән, әлбәттә, вакцинациягә килергә кирәк түгел, ә ул төшкәнне көтү яхшырак.

– Әйтегез әле, ә сез үзегез прививка ясатасызмы?

– Әлбәттә, ел саен. 18 яшьтән үк аңлы рәвештә прививка ясатам, табиб-инфекционист булганчы ук. Дөресен генә әйткәндә, үз тәҗрибәмдә мин гриппка каршы вакцинацияне хуплап кына калмыйм, ә пропагандалыйм, авырсам да, барысын да җиңелрәк кичерәм. Берничә елны авырмадым.