Сомнолог йокысызлыкны җиңү өчен киңәшләр бирде

Йокысызлык – хәзер иң еш очрый торган проблемаларның берсе. Аның килеп чыгу сәбәпләре төрле булырга мөмкин, әмма аны үз көчең белән җиңү өчен универсаль киңәшләр бар. Алар турында сомнолог Кадрия Вәлиева сөйләгән.

Беренчедән, эксперт бер үк вакытта йокларга ятарга һәм бер үк вакытта йокыдан торырга киңәш итә. Аның сүзләренчә, олы кешеләргә тәүлегенә уртача 7-9 сәгать йокларга кирәк.

«Матрас, мендәр һәм урын-җирнең уңайлы булуына инаныгыз. Бүлмәдә тыныч, караңгы һәм уңайлы булырга тиеш. Йоклар алдыннан телевизор карамагыз, гаджетлар кулланмагыз», – дип сөйләгән ул «ГТРК Татарстан» телеканалына.

Шулай ук белгеч, йокларга 4-6 сәгать кала кофе, чәй һәм алкоголь эчмәскә киңәш итә. Йокларга кимендә 2-3 сәгать кала ашамау хәерле. Шулай ук сыеклыкны җитәрлек күләмдә кулланып, организмдагы су балансын саклау мөһим.

Йокысызлыктан интегүче кешеләргә, мөмкинлеккә карап, урамда күбрәк вакыт уздырырга кирәк. Бу биологик сәгатьләрне синхронизацияләү өчен мөһим.